Danmarkimi suliumajunnaartoqarnerani Nunatsinnik susinnaajunnaarsitsisinnaasoq
Danmarkimi naalagaaffik sulisartullu kattuffii maanna isumaqatigiinniarnerminni isumaqatigiissuteqarsinnaassanngippata, suliumajunnaartoqarsinnaavoq aamma sulisitsisut mattussisinnaassallutik. Tamatuma kinguneranik Nunatsinni attaveqaqatigiinneq unittoortinneqarsinnaavoq
Danmarkimi naalagaaffimmi, kommunini nunallu immikkoortuini atorfillit nutaamik isumaqatigiissusiortussaapput, isumaqatigiinniarnerilli tamarmik maanna ajalusoorlutik. Taamaattumik Isumaqatigiissitsiniartartut illuatungeriit naapisinniarnissaat isumagisussanngorpaat.
Massakkorpiaq sulisartorpassuit aaqqiagiinngissuteqalernissaat ilimasaarutigineqareerpoq, poorskillu kinguninngua atuutilersinnaalluni. Tamanna Danmarkimuinnaanngitsoq aammali Nunatsinnut kingunerlussinnaavoq.
Sermitsiaq taama allaaserisaqarpoq.
DMI-p allaffia matuneqarsinnaasoq
Assersuutigalugu naalagaaffimmi atorfillit suliumajunnaassagaluarpata Kangerlussuarmi DMI-mi sulisut angerlartinneqassapput allaffillu matuneqarluni. DMI-p pisortaa Marianne Thyrring oqarpoq.
- DMI-mi ima inissisimavugut, sulisartut kattuffii sisamat suliumajunnaarnissamik ilimasaaruteqareerlutik. Silasiortut, ingeniørit, inatsisilerituut aamma aningaasaqarnermik ilinniarsimasut, Magisterit peqatigiiffiannut ilaasortat, IDA-mut aamma DJØF-imut ilaasortat pinngitsoorsinnaanngilavut. Inuit pineqartut tamakku tamarmik angerlartinneqarpata, naalagaaffeqatigiinnik sullissisinnaanitsinnut sunniuteqassaqaaq. Silassamik ilimasaarutit immikkut ittut timmisartumik angallattunut suliarisartakkavut, piumasaqaatit naapertorlugit suliarisinnaajunnaassavavut. Timmisartut minnissaannut silamik ilimasaarutit pineqarput, taakkulu Kalaallit Nunaannut tunngatillugu pingaarutilerujussuullutik, nalinginnaasumimmi silap qanoq innissaa siulittoruminaatsuusarmat, Marianne Thyrring oqarpoq, tamatumunngalu atatillugu tikkuarlugu siunissami ajornerpaamik pisoqarsinnaasoq.
Allaaserisaq tamaat Sermitsiami atuaruk, taanna uani ataani linki tooriarlugu pisiarineqarsinnaavoq.