Nanoq Power naalakkersuisoqarfiup siulittaasuanik maalaaruteqartoq
Svend Hardenberg aamma Jørgen Wæver Johansen naalakkersuisoqarfiup pisortaanit Jørn Skov Nielsenimit uukapaatinneqarsimasutut pisuutitsipput
Nukissiornermik ingerlatseqatigiiffiup namminersortunit pigineqartup Nanoq Powerip, inuussutissarsiortunit Jørgen Wæver Johansenimit Arne Hardenbergimillu siuttuuffigineqartup, ingerlatseqatigiiffiup Nanortallip eqqaani erngup nukinganik suliniummut misissueqqaarnissamik qinnuteqaataata suliarineqarsimanera Ombudsmandimut maalaarutigaa. Nanoq Power naapertorlugu suliassaq assigiissumik pineqarnissamik tunngaviit malittarisassallu atuuttut naapertorlugit ingerlanneqarsimanngilaq.
Sermitsiaq taama allappoq.
Suliami, 2016-imi aallartittumi, pineqarpoq nukissiornermik ingerlatseqatigiiffiup namminersortup Nanoq Powerip, sivisuumik pilersaarusioreersimalluni Inuussutissarsiornermut, Suliffeqarnermut,
Niuernermut Nukissiuuteqarnermullu Naalakkersuisoqarfimmut Nanortallip eqqaani suliniummut misissueqqarnissamik
qinnuteqaataa. Suliaq qaammatit pingasut suliarineqareersoq ingerlatseqatigiiffiup qinnuteqaamminut itigartinneqarpoq, tunngavilersuutigalugu Nukissiorfiit qinnuteqarfigisaq kingusinnerusukkut misissuiffigisassatut immikkkoortikkusukkaa. Illulli iluani pappialaatini takuneqarsinnaavoq tamanna
immikkoortinneqarsimasoq Nanoq Powerip misissueqqaarnissamik qinnuteqarnerata kingorna.
Nanoq Power oqarpoq suliap sivisuumik piareersarneqarnerani 2017-imi septembarimi qinnuteqarnissamik tungaanut naalakkersuisoqarfimmi pisortamit Jørn Skov Nielsenimit uukapaatinneqarsimallutik.
Naalakkersuisoqarfimmi ilumuunnginnerarneqarpoq erngup nukinganik nukissiorfissatut ilimanaatillit kisermaanniarneqartut, tamannali peqatigalugu innersuussutigineqarluni inatsisit malillugit namminersorlutik oqartussat erngup nukinganik ilimanaatilinnik misissueqqaarnissamut atuinissamullu kisermaassisuusut.
Kingullermik Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen suliamut akuleruppoq, piumasaralugulu suliap ingerlarnga iternga tikillugu misissorneqassasoq. Tamatumali kinguninngua qinersinissaq nalunaarutigineqarpoq.
– Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfimmik Jørn Skov Nielsenimillu suliamik, uagutsinnut tunngasumik suliarinninnerannik isorinninnera attatiinnarpara. Jørn Skov Nielsen oqarpoq suut tamarmik malittarisassat malillugit ingerlanneqarsimasut. Uagut isumaqarpugut taamaattoqanngitsoq, uppernarsaatissaqarpugullu. Taamaattumik Ombudsmandimut maalaaruteqarpugut, Svend Hardenberg oqarpoq.
Suliaq pillugu allaaserisaq Sermitsiami atuaruk. Aviisi uani pisiassaavoq: