Timmisartoq suli uninngatinneqartoq
Ullumi Københavnimiit Kangerlussuarmut timmisartuussisoqarsinnaannginnera, Air Greenlandip ajuusaarutigaa.
Sapaatip akunnerata naanerani timmisartup kingoraatissaanik taarsiisoqarnerata kingorna, ullumikkut atuleqqinnissaa pilersaarutaasimangaluarpoq. Timmisartulli ullumikkumiit atulerneqarsinnaannginnera, timmisartuutileqatigiiffiup marlunngornerup ullaatungaani paasivaa.
Kinguaattooqqangaatsiarnerit
Taamaasilluni sisamanngornermi Københavnimiit timmisartuussinissaq kinguaattoorfiungaatsiarpoq. Københavnimiit Kangerlussuarmut angalasussat apuunniarlugit timmisartunik marlunnik attartortoqarsimavoq, nalunaaqutarlu 15.30 aamma 16.40 aatsaat timmisartuussisoqassaaq.
Angalasut ullumikkut Københavnimut angalasussat aqagu tallimanngornermut arfininngorpamulluunniit aallarnissartik naatsorsuutigisariaqarpaat, tamanna timmisartortartut qasuersaartitaanissaannut maleruaqqusanik peqquteqarpoq.
Timmisartup Danmarkiliartaatip kinguaattooqqangaatsiarnerata kingunerisaanik nunap iluani timmisartuussinerit kinguaattoorfiullutillu ilaat taamaatinneqartariaqarsimapput.
Naammaginanngitsoq
- Tamanna naammaginanngilluinnarpoq. Maanna ullut tallimassaannik Kalaallit Nunaata iluani avammullu timmisartuussinissatsinni ilaasussagut kinguaattoorput.
Angallavissanut nutaamik pilersaarusiorluta ulapputtorujussuuvugut, ilaaffissanut allannguinerit taamaalillunilu angalanissamut pilersaarutigut nutaat ilaasussatsinnut nassiunneqarsinnaaniassammata, attaveqaqatigiinnermut
pisortaq Katrine Hjelholt Nathanielsen oqarpoq.