IA-p siulittaasua: Pisassiissutit tamanit oqartussaaqataaffigineqarlutik siammarterneqartassapput
Qinersinissaq pissutigalugu aalisarnermut inatsisissamut siunnersuutip assortuussutaasoq atorunnaarsinneqartorlu, IA-p siulittaasua Sara Olsvig, aalisarnermut inatsimmik nutaaliornissaq nalunaarutigaa.
Aalisarnermit isertitat naapertuuttumik agguaattalernissaat aamma pisassiissutinut piginnittuunerup siammarterneqarnerunissaanik qulakkeerinnittumik pisassiissutinik agguaasoqartalernissaa, Sara Olsvigip oqaatigaa.
Aalisarnermik inuussutissarsiorneq nukittooq
Kisianni aalisarnermik inuussutissarsiornermik nukittuumik pilersitsinissaq aalajangiisuusoq, Sara Olsvigip aamma oqaatigaa.
- Suliffeqarfik piginnaasanik nunarsuarmi siuttunngornissamut ineriartortitsissappat aningaasaateqarlunilu ilisimasanik peqalersimasariaqarpoq. Akiliisinnaajunnaarnerit uteqattaartut ukiumiillu ukiumut qulartarnerit atorsinnaanngillat, Sara Olsvig tusagassiuutinut nalunaarummi allappoq.
Aalisarneq piujuaannartitsinermik tunngavilerlugu, ilisimatuussutsikkut ilisimasat pitsaanerpaat tunngavigalugit, najukkani aalisartut piniartullu ilisimasaat tunngavigalugit ingerlanneqassasoq taassuma naqissuserpaa.
Inuit Ataqatigiinni siulittaasup aalisarnermut inatsisip qanoq aaqqissuunneqarnissaa pillugu aalajangiussamik oqaaseqarfiginaveersaarnikuugaluarpaa. Piffissaligaanngitsumik pisassiissutit taamaatinnissaat partiip kissaatigineraa oqaatigilluanngilaa, naak taama isikkoqarpasikkaluartoq, tamatuma saniatigut kilisaataatillit nutaamik aningaasaliissuteqarnissaminnut aningaasaatinik pissarseqqaartarnissaat isumaqarfigigaluarlugu.
Ilinniarfik nutaaq
IA-p siuttuata tamatuma saniatigut kalerriutigaa, Ilisimatusarfimmi nutaamik ilinniarfimmik pilersitserusuttoq, aalisarnermit aningaasarsiornermit tunngasunik suliaqartussamik.
- Aalisarnermit tunisassiornermi piginnaasanut ilinniarfinnik pitsaanerpaanik peqarnissarput qulakkiissavarput. Sulisartunut ullut tamaasa imaani nunamiluunniit ilungersorlutik aalisakkanik avammut tunisassiatsinnik passussisartunut patajaannerusumik aningaasarsiorsinnaanissaannik ilinniaqqissinnaanissaannillu qulakkeerinnilluarnerussaagut, Sara Olsvig allappoq.