Krentzmann: Inissinniuunnissamut sukataarussisoq
Nordsjælland Håndbold Akutaaneq Kreutzmannilu danskit assammik arsaallutik ligaanni maannamut tupaallatsitsinerpaanut ilaapput.
Danskit assammik arsaattartut ligaanni peqatigiiffiit arfineq-pingasut sorliit inissinniuunnermut peqataassanersut paasineqarnissaata tungaanut, unamminerit pingasut suli amigaataapput.
Nordsjælland Håndbold massakkut arfineq-pingajuattut inissisimavoq. Peqatigiiffiup Mors-Thy Håndbold, Skanderborg Håndbold suli unammisussaavai martsillu 28-ni naggataarutaasumik TTH Holstebro unammissallugu, tamatuma kingorna peqatigiiffiup inissinniuunnerni unammeqataassanerluni paasissavaa.
Peqatigiiffimmi peqataaqqaartoq
Ukiumi pisartup aallartinnginerani Akutaaneq Kreutzmann Ribe Esbjerg HH-miit Nordsjælland Håndbold-imut nuuppoq, tamannalu kalaallip nunanut allanut unammisartup peqqissimissutiginngilaa.
- Peqatigiiffimmiinnera iluaraara, Københavnimilu najugaqarnera toqqissisimanaralugu, Akutaaneq Kreutzmann Sermitsiaq.AG-mut oqaluttuarpoq nangillunilu:
- Unamminerit kingulliit pingasut assut pissaganassaput. Qujanartumillu qanoq inissinnissarput nammineq aalajangersinnaavarput. Unammeriaaserpullu ingerlatiinnarsinnaagutsigit inissinniuunnissamut peqataassaqqaarpugut, Akutaaneq Kreutzmann isumalluaqaluni oqarpoq
Nordsjælland Håndbold-ip ilaatigut Bjerringbro-Silkeborg, KIF Kolding København aamma Aalborg Håndbold ukiumi pisartup aallartinnerani ajugaaffigisimavai.
Isumaqatigiissut sivitsorneqartoq
Akutaaneq Kreutzmannip aamma Nordsjælland Håndboldip isumaqatigiissutsip ukiumik ataatsimik sivitsorneqarnissaa aalajangersimavaat. Taamaammat ukiumi pisartup nutaap aallartinnerani
Akutaaneq Kreutzmann peqatigiiffimmut aamma unammisartuussaaq.
Nordsjælland Håndboldimi saamiatungaani illersuisartoq Nicolaj Pedersen peqatigiiffimmi unammisartuujunnaassaaq taamaasilluni Akutaaneq Kreutzmann periarfissangissaalissaaq.
- Saamiatungaaniillunga unammerusunnerusarpunga, Nicolaj Pedersenillu KIF Kolding Københavnimut nuunnerata kinguneranik tamanna periarfissaqarfigilissavara. Periarfissarlu tamanna atorluarniassavara, Akutaaneq Kreutzmann naggasiivoq.
16-nik ukioqarluni Danmarkiliartoq
28-nik ukiulik Akutaaneq Kreutzmann danskit ligaanni misilittagartuutut oqaatigineqarsinnaalluarpoq. Akutaaneq Kreutzmannimmi inuussuttuaraalluni peqatigiiffimmi Silkeborg-Voel KFUM-imi danskit assammik arsaallutik ligaanni unammisartunngornerminiit, ukiumi pisartut aqqaneq-marlungajaat peqataaffigereersimavai.