Qinersinermi allannguisinnaasoq: Niels Thomsen qinigassanngorteratarsinnaasoq
KNI A/S siulersuisunut siulittaasuusimasup, Niels Thomsenip, sooq ippassaq siulittaasutut tunuariasaarnini nassuiarusunngilaa. Inatsisartunut qinigassanngortissanersoq taamattumik erseqqissinngilaq.
Niels Thomsenip ippassaq ingerlaannaq atuutilersumik KNI A/S-imi siulersuisunut siulittaasutut tunuarniarluni aalajangernera tupaallannartuuvoq.
Tunngavilersuutaa
Tusagassiuutinut nalunaarummi ima tunngavilersorneqarpoq:
”Siunissami sulinissannut piffissamillu pingaarnersiuinermik”.
Sermitsiaq.AG-p pingasunngornermi ullaakkut Niels Thomsen oqarasuaatikkut oqaloqatigimmagu, KNI-mi qullersatut tunuarnerup aalajangiunnerani uissuumminartortaqanngitsoq naqissusiivoq.
Inatsisartunut qinersinermut sassalerpit?
- Tamanna oqaaseqarfiginianngilara, Niels Thomsen oqarpoq.
Eqqoriaanerit
Demokraatinit Inatsisartunut ilaasortaanikuuvutit. Partiimut tassunga suli ilaasortaavit?
- Eqqoriaanerpassuarnut nukissannik atuinianngilanga. Sapaatip-akunnerata missaa qaangiuppat qanoq eqqarsaateqarnerma nalunaarutiginissaanut piariissaanga, Niels Thomsen oqarpoq.
Aamma atuaruk: Siulersuisuni siulittaasoq ingerlaannartumik tunuarpoq
Demokraatit siulittaasuat Randi Vestergaard Evaldsen Sermitsiaq.AG-mut ilisimatitsivoq, partiip qinigassanngortitaata allattorsimaffiat sapaatip-akunnera qaangiuppat saqqiummiunneqassasoq. Niels Thomsen allattorsimaffimmiinnersoq oqaatigerusunngilaa.
Kandidatitut ilinniarsimasoq
Niels Thomsen administrationi aamma aqutsineq – (cand.scient. adm.) Ilisimatusarfimmi – 2009-mi naammassivaa.
Tunisassiorfimmi Halibut Greenlandimi pisortaavoq, taanna Ilulissaniippoq.
Aningaasaqarnermut naalakkersuisoqarfimmi fuldmægtigitut atorfeqarnikuuvoq, piffimmilu juunip 2-annit 2009-mit decembarip 15-anni 2011-ip tungaanut Demokraatini Inatsisartunut qinigaanikuuvoq. Taamani ataatsimiititalianut assigiinngitsunut siulittaasuuffeqarlunilu siulittaasumut tullersortaaffeqarpoq, Aningaasaqarnermut-, Akileraartarnermut aamma Akitsuutinut, Inuussutissarsiornermut-, aamma aalisarnermut ataatsimiititaliat allallu ilanngullugit.