Martin Møllerip ujakkaartarnini taamaatippaa

37-nik ukiullip Martin Møllerip Nuummeersup ukiuunerani OL-ertoqarnerani Sydkoreami Pyeongchangimi ujakkaarluni 50 kilometerimut arpannermi unamminera kingulliuvoq.

Taanna Sermitsiaq.AG-mut ilisimatitsivoq.

- 50 kilometerimut arpannermi kilometerit tallimat kingulliit arpallugit OL-imi misigisaq nuannernerpaavoq. OL-imi 50 kilometerimut arpannermi ujakkaartarninni naggataarutigalugu misigissuseq nuannerluinnarpoq, taanna oqarpoq, tassani 60-iulluni apuuppoq.

Pitsaanerpaaffimminiinngitsoq
Ukiuunerani OL-ertoqarnerani pitsaanerpaamik arpassimanani, Martin Møller oqarpoq.

- Nualaarnerma pitsaanerpaaffinniitinngilaanga. Tamanna naammagisimaarpallaanngilara. Kisianni arpanninni pitsaanerpaamik angusaqarniarsarillungalu Pyeogchangimiippunga. Maanna unammilligassaqartillunga pitsaassusera annertusiniarsaralugu suliniarnera ilikkagaqarfiuvoq, taanna erseqqissaavoq.

Atuaruk: Siulittaasoq: Timersortartut marluk OL-imut peqataalernerat angusarujussuuvoq

Nuummut angerlartoq
Ukiut sisamat matuma siorna OL-ertoqarneranut sanilliullugu, Sydkorea Sochimit nillernerusoq, taanna oqarpoq.

- Taamaammat ukiuunerani OL-ertoqarneratut misiginarneruvoq. Timersuutit aamma amerlanerit illoqarfimmi OL-erfiusumiipput, timersuutillu allat aamma misigisaqarfigaakka. Ataatsimut isigalugu peqataanera naammagisimaartorujussuuara, taanna oqarpoq.

Martin Møller maanna Nuummut angerlarpoq.

- Ilaquttannut angerlarnissannut qilanaartorujussuuvunga. Maanna Københavnimut ingerlaarlunga Bangkokimiippunga, Nuummullu ingerlaqqissaanga, Martin Møller oqarpoq.