Telep qamittoornissaanut navianartorsiorneq minnerpaasoq

Atortut nutarterneqarnerinut atatillugu innallagissap qaminneqarnerani attaveqaatit sunnerneqarnavianngitsut, Tele-Postip attaveqaqatigiinnermnut pisortaa Arnakkuluk Jo Kleist Sermitsiaq.AG-mut ilisimatitsivoq.

Pilersaarutaasumik innaallagissamik qamitsineq unnuaru nalunaaqutaq 02.00-ip aamma 06.00-ip akornanni pissaaq.

- Innaallagissap qaminneqarnerani attaveqaatit sunnerneqannginnissaat pilersaarutaajuaannarsimavoq. Kisianni soorunami qamittoornissamut navianartoqarpoq, ingerlatseqatigiiffiup attaveqaqatigiinnermut pisortaa Sermitsiaq.AG-mut ilisimatitsivoq.

Tamanna internetimut, oqarasuaatinut mobilinullu atuuppoq.

- Kisianni attaveeruttoortoqassagaluarpat satellit-telefonimit allamut satellit-telefonimut sianersinnaaneq periarfissaavoq. Taamaalilluni assersuutigalugu mobiliminngaanniit satellit-telefonimut sianertoqarsinnaanani, Arnakkuluk Jo Kleist oqarpoq.

Atuaruk: Mianersoqqussut: Tele-Postip attaveeruttarnissaq nalunaarutigaa

Politiit piareersimasussaapput - qanorluunniit pisoqaraluarpat
Sermitsiaq.AG-p politiit sooq qamittoornermi satellit-telefonimut sianertoqarsinnaanera pillugu tusagassiuutinut nalunaarummi nassiussisimanersut aamma oqaloqatigaat. Tassami Tele-Postip qamittoorsinnaanermut minnerpaamik navianartoqarnera nalilernikuummagu.

- Attaveqaatimmi tamarmik qamittoornissaannut piareersimasussaavugut. Qamittoortoqassappat innuttaasut qanoq attaveqarfigisinnaassaneraatigut ilisimatinneqartariaqarput, Gedion Quist Nuummi politiineersoq oqarpoq.

Tele-Postip aamma Kalaallit Nunaanni Politiit akornanni attaveqaqatigiittoqarsimasoq taanna oqarpoq.

- Attaveqaatit qamittooratarsinnaanerannut navianartorsiornerup annikitsuararsuunera nalunngereerparput. Innuttaasut isumannaatsuunissaat uagut salliutipparput. Naak qamittoortoqarsinnaagaluartoq piareersimasussaavugut, Gideon Quist oqarpoq, politeeqarfiit tamarmik unnuaru inoqartinneqassasut taanna ilisimatitsivoq.