Sulorarneq
Sulorartartut iligiikkaarluni EM-ernermut peqataassapput
Sulorarluni iligiikkaarluni Europami pissartanngorniunnerit Ruslandimi pissapput, februaarip 11-anni aallartissallutik. Tassani angutit arnallu inersimasut nunanut allanut unammisartut EM-imut peqataassapput
Kalaallit sulorartartut nunanut allanut unammisartui siullermeerlutik iligiikkaarluni EM-imut peqataassapput.
Pissartanngorniunnerit Ruslandimi illoqarfimmi Kazanimi februaarip 11-anni pissapput. Kalaallit unammisartut februaarip 9-anni aallassapput.
Kalaallit angutitaat England, Ungarn aamma Slovakiet gruppeqatigaat, arnat Bulgarien, Frankrig aamma Hviderusland makissimavaat.
Iligiikkaarluni EM-ernissamut novembarimi ilannguppugut, tassanngaanniillu peqataajuaannalissaagut. Aappaagu iligiikkaarluni aamma VM-ernissamut, Sudurman Cupimut, peqataanissamut suliniuteqartoqarpoq, sulorartartut kattuffiata siulittaasua Michael Kleist Sermitsiaq.AG-mut oqarpoq.
Alloriarneq annertooq
Kattuffiup Island Gamesimuinnaanngitsoq unamminernut allanut peqataasalernissaq sulissutigisimagaa, taanna oqarpoq.
- Annertuumik alloriarpugut, Elite Sport Greenlandip suleqatigineratigut unammisartunik Ruslandiliartitsinissaq piviusunngorsinnaasimavoq. Nunanut allanut unammisartut ataasiakkaat aamma unamminernut annertuunut peqataasarnissaat sulissutigaarput, Michael Kleist oqarpoq.
Ulluni makkunani kalaallit Islandimi sulorarluni nunat tamalaat unammiuaarneranni, Iceland Internationalimut peqataapput.
Ataasiakkaarluni anngunniunnerit sisamanngornermi siulliit pissapput, iligiikkaarnermi aamma arnat angutillu iligiikkaarneranni tamarmik annguteqapput, Michael Kleist ilisimatitsivoq.
Sara Lindskov Jacobsen aamma Milka Brønlund arnani peqataapput, angutinilu Taatsiannguaq Pedersen, Toke Ketwa-Driefer, Jens-Frederiksen aamma Sequssuna Fleischer Schmidt peqataallutik.