Aqumiunngortoq siulleq

Polar Seafood-ip nammineq aqumiunngorniartitaani qanittumi ataaseq fiskeskipper af 1. grad angusiffigalugu soraarummeerpoq.

Soraarummeertoq tassaavoq Tobias Motzfeldt, 34-nik ukiulik, Nuummeersoq. Tobias Motzfeldt kilisaammi Acadienne Gale II-mut inuttaalluni aquttup tulliatut 1. januar 2018-imiit ikivoq. Kilisaat ikiffia Kalaallit Nunaata kitaata avataani raajarniartussaavoq. Polar Seafood tusagassiuutinut nalunaaruteqarluni taama allappoq.
Ulloq uannut pingaartuuvoq, tassami ukiorpassuarni sulinikkut atuagarsornikkullu ilinniareerlunga, ilinniarsimaninnut uppernarsaatiga tigummisinnaalerpara, Tobias Motzfeldt oqarpoq.

Ilinniartitsineq aaqqissuussaalluartoq
- 2000-ip aasaani Tobias 17-inik ukioqarluni Polar Seafood-imi sulilluni aallartippoq, Polar Nattoralimmut ikigami, inuttalersuisarnermut pisortaq Jens Jørgen Kuluk Egede Nuummi qitiusumik allaffimmeersoq oqaluttuarpoq.

- Ilungersuuteqarluni angusassaminillu toraagaqarluni suliniarnera pissutaalluni, aqumiunngorniaqatigiinnik siullernik, umiarsuaatileqatigiiffiup 2015-imi aallartitaanut, toqqaaniarneqalermat taanna toqqakkanut ilaasimavoq, taavalu taamanili assigiinngitsunik ilinniagaqarluni Imarsiornermik Ilinniarfimmiittarsimalluni, taamaalillunilu juullinngitsiartoq ilinniartuutitsinnit siullersaalluni ilinniakkaminik naammassinnissimalluni.

Jens Jørgen Kuluk Egede tusagassiuutinut nalunaarummini allappoq Polar Seafood-ip kilisaataataanni kalaallinik amerlanerusumik aqumioqalernissaq ukiorpaalunni assut kissaataasimasoq. 2014-milu kilaasaataatileqatigiit nammineq ilinniartitsinermik aallartitsipput.

- Kilisaataativut avataasiortut tassaapput tunisassiorfissuit puttasut teknikkikkut siuarsimasorujussuarnik atortulersukkat, taamaattumik ilinniagaqarsimanissamik piumasaqaatit qangaanerusumut naleqqiullugu sakkortunerujussuupput. Taamaattumik taamani aalajangerpugut nammineerluta iliuuseqarniarluta, sulisuttalu akornanni ilinniartussat piukkunnartut peqqissaartumik toqqarsimallutigit, pisussaaffileeqatigiinnikkullu isumaqatigiissusiorfigalugit piffissami sivisuumi ilinniarnissamik neqerooruteqarsimalluta.

Umiarsuarmi naalaganngorusuppoq
Taamaalilluni Tobias Motzfeldt ilinniartinneqalertuni siullersaalluni naammassivoq. Acadienne Gale II-mullu ikinissaminut qilanaarpoq. Allamilli suli angorusutaqarpoq.

- Ilisimalluarpara aqumi umiarsuup naalagaatut akisussaaffik anguniassagukku, misilittagarpassuit suli piumasaqaatigineqartut pigisariaqarlugit, allanngortitassaanngitsumilli aajangersimavunga piumasaqaatit pisariaqartut naammassiniassallugit, naammasserlaaq taama oqarpoq.