Tunngaviusumik inatsisissaq pillugu isumalioqatigiissitaq
Sukap peqqusinera siulittaasoqarfiup malikkumanngilaa
Naalakkersuisut nutaamik sulinissamut tunngaviliillutik akuersissutigineqarnissaata tugaanut Tunngaviusumik inatsisissaq pillugu isumalioqatigiissitami siulittaasoqarfimmiittut, Vivian Motzfelt aamma Mimi Karlsen, suliumajunnaarput.
Taakku taamaasillutik, Suka K. Frederiksenip ulloq 8. december-imi isumalioqatigiissitami ilaasortat sulileqqinnissaannik peqqussuteqarnera, malikkumanngilaat. Tamanna Suka K. Frederiksenip KNR-mut sisamanngornermi 4 januar unnukkut oqaatigeqqippaa.
Tusagassiuutinut nalunaarut
Isumalioqatigiissitami suliaqarnermi akisussaasoq Suka K. Frederiksenip peqqusinera siulittaasoqarfiup malikkumanngilaa. Tamanna tallimanngornermi ualiartortoq tusagassiuutinut nalunaarummi nassiunneqarsimasumi allassimavoq.
- Atassutip Inatsisartunut ilaasortaatitaqarunnaarneratigut aammalu Kommune Qeqertalimmi borgmesterinngortup Inatsisartunut ilaasortaajunnaarneratigut sulinitsinni tunngavigisarput naleqqukkunnaarmat novembari aallartilaaginnartoq Naalakkersuisut qinnuigaagut suliakkiissutinut najoqqutassiaq nutaanngorsaqqullugu, tusagassiuutinut nalunaarummi allassimavoq.
- Naalakkersuisut aalajangernissaasa tungaannut aalajangerpugut sulinerput unitsikkallarniarlugu, neriulluta Naalakkersuisut sulisitsisutut akisussaassusertik naapertorlugu ajornartorsiut piaartumik aaqqiivigissagaat, sulinitsinni tunngavigisatsinnik ilerasuutigalugu unioqqutitsilluta ingerlalinnginniassagatta, isumalioqatigiissitami siulittaasoqarfik erseqqissaavoq.
Pinaasertoqanngitsoq
Taakku marluullutik pinaasinnginnertik uppernarsarpaat.
- Maanna killiffipput tassaavoq sulinitsinni tunngavigisarput nutaaq Naalakkersuisut akuereriarpassuk suleriaqqissinnaanngussalluta. Tassa piareersimavugut, taakku oqarput.
Aamma atuakkit:
Randi: Tunngaviusumik inatsisissaq pillugu Isumalioqatigiisitaq quianaannarpoq
Isumalioqatigiissitap nunap karsia 7,4 millionit koruuninik artukkerpaa