internetti
Internetti sukkaneq Tele-Postimi atuisut akilerusussinnaavaat
Tele-Postimi internettimik atuisut amerlasuut atuisuuffitik flatrate-mik nioqqutinut nutaanut nuussimavaat, tassani atuisut immikkut akiligassinneqanngikkaluarlutik killeqanngitsumik data-mik atuisinnaallutik.
Pingaartumik sumiiffiit internettip sukkassusianik 2-miik 30 Mbit-imut taarsiinissamik periarfissaqalerfiusuni piumaneqarnera annertusimavoq. Tamanna soorlu Sisimiuni atuuppoq, tassani imaatigut kabeli atorlugu sukkassutsit pilerinartut nioqqutigineqalersimapput.
25 procentii taarsiisimasut
- Sumiiffinni pineqartuni internettimik atuisugut 25 procentit sinnerlugit Tusass internettimut taarsiisimapput, attaveqaqatigiinnermut pisortaq, Arnakkuluk Jo Kleist Sermitsiaq.AG-mut paasissutissiivoq.
Internettimik nioqqutit nutaat saqqummersinneqarneriat naqitanngorlugu elektronikkikkulli pilerisaarutit amerlasimaqaat.
Mailerutit sianernerillu amerlasuut
Qaammatip ataatsip matuma siorna saqqummersitsisoqarneraniit telemi immikkut ulapputaasimavoq, taakku decembarip qaammataani qaammammut agguaqatigiisillugu siarnguttut 70 procentimik amerlanerit mailikkulli saaffiginissutsit 87 procentimik amerlanerusut suliarisimavaat.
Nioqqutit nutaat saqqummersinneqannginnerini atuisut atuisuuffitik qangarnitsat flatrate-nut nutaanut 2, 10 aamma 30 Mbit-imik periarfissaqalersut qanoq isillutik taarsersinnaaneraa, tele-mik ingerlatseqatigiiffiup misissorsimavaa. Paasinarsisimavorli atuisut amerlanerpaartaasa nioqqutigineqartoq sukkaneq akisunerusorlu toqqartaraat. 30 Mbit qaammammut 1.199 koruuninik akeqarpoq.
- Maannangaaq ilimagisamit Tusass internettimik atuisut procentinik arfineq-pingasunik amerlanerupput. Nioqqutigineqartorli 30 Mbit pilerigineqarsaavoq, Arnakkuluk Jo Kleist paasissutissiivoq.
Imminut kiffartuunneq
Atuisut internettimik imminut kiffartuussivikkut nioqqutinut nutaanut nammileerlutik taarsiisinnaanerat, tele-mik ingerlatseqatigiiffiup piareersarsimavaa.
- Atuisut amerlanerpaartaasa Tusass.gl-p atornissaa paasisimavaat, tassani imminut kiffartuussivik atorlugu nammineq taarsiisinnaallutik. Nioqqutigineqalertumulli Tusass internettimut nammineerluni nuuttoqarsimannginnera ataasiakkaaniit paatsoorneqarsimavoq. Inoqartuassaarli pisiniarnermut, iserniarnermut Tusass.gl-miluunniit atuisuuffiit allanngortinneqarnissaanik ikiortariaqartunik. Nittartakkami imminut kiffartuussivik qanorluunniit pisariillisarneqartigisimngaluarpat tamanna pinngitsoorneqarsinnaanngilaq, attaveqaqatigiinnermut pisortaq erseqqissaavoq.