Tunngaviusumik inatsisissaq pillugu isumalioqatigiissitaq
Suka isumalioqatigiissitamut: Sulineq massakkut aallartilli
Tunngaviusumik inatsisissaq pillugu isumalioqatigiissitap sulerusunnginnera, Namminiliivinnissamut Naalakkersuisup Suka K. Frederiksenip ajuusaarnartippaa
Namminiilivinnissamut Naalakkersuisup Suka K. Frederiksenip (S) Tunngaviusumik inatsisissaq pillugu isumalioqatigiissitaq piaarertumik sulinernissaanik kaammaattuuteqarpoq.
Taanna tusagassiuutinut nalunaarummi allappoq, isumalioqatigiissitap akerliulluni suliumajunnaarnera Inatsisartut Naalakkersuisulli aalajangingaannik kissaataannillu akerlisoq.
Atuaruk: Sukap peqqusinera siulittaasoqarfiup malikkumanngilaa
Naalakkersuisut nutaamik sulinissamut tunngaviliillutik akuersissutigineqarnissaata tugaanut Tunngaviusumik inatsisissaq pillugu isumalioqatigiissitami siulittaasoqarfimmeersut, Vivian Motzfeltip Mimi Karlsenillu suliumajunnaarnerisa kingorna pivoq.
Isumalioqatigiissitami ilaasortat partiiminniit toqqagaanertik tunngavigalugu ilaasortaapput, taamaattumik Isumalioqatigiissitami siulersuisoqatigiit taakku taamatut toqqagaasimanerat aalajangersaavigisinnaanngilaat, Suka K. Frederiksen nassuiaavoq.
- Isumalioqatigiissitami siulersuisoqatigiit suliakkiissutigineqartut suliarisarissavaat, tassaasullu Tunngaviusumik Inatsisissaq suliarissallugu suliakkiissutinut najoqqutassiaq tunaartaralugu. Tassalu taannaavoq sulinermi tunngaviusussaq atorneqartussarlu Naalakkersuisut allatut aalajangernissaasa tungaannut.
Atuaruk: Randi: Tunngaviusumik inatsisissaq pillugu Isumalioqatigiisitaq quianaannarpoq
Taassuma ajuusaarnartoqartippaa, Tunngaviusumik inatsisissaq pillugu isumalioqatigiissitap sammisat najoqqutassiap avataaniittut arlallit Isumalioqatigiissitap nassuiarsimammagit.
- Ajuusaarnarluinnarpoq, Inatsisartut Naalakkersuisullu suliakkiissutigisaat aalajangiussaallu suliassatut aallunneqannginneri. Siulersuisoqatigiit tusagassiutinut nalunaarutaani paasivara suliassamut aallussineq Tunngaviusumik Inatsisissamut najoqqutassiaq aallaavigalugu suliassaq ukkatarineqanngitsoq, taanna tikkuaavoq.
Atuaruk: Isumalioqatigiissitap nunap karsia 7,4 millionit koruuninik artukkerpaa
Suka K. Frederiksenip paasissutissiaraa, ulloq 11. december isumalioqatigiissitaq tunngavisumik inatsisiliorluni aallartinnissaa sakkortunerpaamik kaammaatuutigisimallugu.
- Massakkullu paasillugu kaammattuineq Isumalioqatigiissitamit soqutigineqarsimanngitsoq, tamannalu akisussaasutut Naalakkersuisutut iliuuseqarfiginiarlugu. Tunngaviusumik Inatsisissami suliaqartoqarnera qulakkeerneqartariaqarpoq, taamaattumillu pisinnaatitaaffigitinneqartut iluanni pisarialimmik aalajangiutoqartariaqarpoq, Suka K. Frederiksen oqarpoq.
Suka K. Frederiksen oqaaseqaataanik ersersaatinniaraluarlugu Sermitsiaq.AG-p pissarsiarisinnaasimanngilaa.