Akileraartarfiup naammagittarsinnaaneq assut misilittartippaa

Danmarkimut ilinniariartorluni nuunneq akeqarsinnaavoq. Tamanna Adam Rielip aggustimi 2016-imi ilinniariartorluni nuuttup nalunngereerpaa. Kisianni Akileraartarnermut Aqutsisoqarfik ikiortigissallugu ajornaannerpaanngitsoq ilisimasimanngilaa.

Aningaasarpassuit
Ukiormanna aggustip qeqqani Akileraartarnermut Aqutsisoqarfimmut attaveqarpoq, ukiup siuliani isertitaminit danskit aamma kalaallit akileraartarfiannut aggustimi 2016-mit ukiup naanissaata tungaanut akileraartarsimagami. Kalaallit Nunaanni akileraartarfimmit 7000 koruuninik pissaqarpoq, taakkulu ilinniartumut 28-nik ukiulimmut HF-mi ilinniartumut aningaasarpassuupput.

Danskit akileraartarfiannut attaveqarneq ajornaquteqanngilaq. Akerlianik suliaq kalaallit akileraartarfianni suliaq naammassineqarnissaa ajorneruvoq.

Arlaleriarluni saaffiginnippoq, tamatigullu suliaq aallaqqaataaniik nassuiartariaqartarpaa, akileraarnermullu tunngasunik iluarsisaqarusunnerarluni, taamaalilluni akileraarutigivallaarsimasani tiguniassagamigit.

Qarmakkamut aporluni
Adam Riel qarmakkamut akisussaaffimmik tigusiumasoqanngitsumut aporsimasutut misigisimavoq. Ullut ilaanni Akileraartarnermut Aqutsisoqarfiup it-systemia ingerlanissamisut ingerlanngitsoq ilisimatinneqarpoq.

Novembarip aappaanni iluatsitsilersutut misigivoq, mailikkut ima nalunaarfigineqarpoq:

- Goddag Adam. Systemit nutaat pissutigalugit qaqugu iluarsineqarsinnaanersoq oqaatigisinnaanngilarput, kisianni Danmarkimi Skat 2016-mi ukiumut akissarsianut tunngatillugu pissarsiarisimanera nalunaarutigaarput. Inussiarnersumik inuulluarit, maili tamaanga naavoq.

Tupigusuttoq
Kisitsisit ''systemimi nutaami'' piginngikkunikkit danskit akileraartarfiannut nalunaarutigisinnaagaa, Adam Rielip tupigusuutigaa.

Arlaleriarluni saaffiginneqqittariaqarsimavoq, aammaarlunilu aallaqqaataani nassuiaasariaqarsimavoq, iliuuseqartoqaranilu.

Nalornilluni Sermitsiaq.AG-mut saaffiginninniarluni aalajangerpoq, Akileraartarnermut Aqutsisoqarfimmi suliassamik isumaginnittarnerup sivisussusaat kiffartuussinerullu qaffasissusaa sammitinniarlugu.

- Kalaallit Nunaanni akileraartarfiup utertitassai qaqugu tigussanerlugit suli paasissutissarsinngilanga, qularnanngilarlu amerlasuut taama inissisimasut, tassani sulisut suliassartik ilisimanngimmassuk, Adam Riel oqarpoq.

Pitsaanngitsoq
- Pisortani sulisut suliartik suliarisinnaanngippassuk, taarserneqartariaqarput imaluunniit ilinniartinneqartariaqarput, Adam Riel naqissusiivoq, tamatuma saniatigut Akileraartarnermut Aqutsisoqarfimmi sulisunit akisussaaffimmik ilisimaarinninnermik annerusumik ujartuivoq.

- Sooruna Kalaallit Nunaanni suliffigisamut akisussaaffimmik tigusinnginnissaq taama nalinginnaatigisoq? Sooq suliatit suliarisinnaanngikkukku suleqatit aperinianngiliuk? Kanngunarmat? Sunngitsuusaarnerit kanngunarnerusoq isumaqarpunga, Viborgimi ilinniartoq oqarpoq, taassuma nassuerutigaa, ''suliaq kusananngitsuliaralugu'', kisianni naammagittarsinnaanera naammatsissimavoq.

Aqutsisoqarfimmi pisortaq tulluusimaanngitsoq
Aqutsisoqarfimmi pisortap Kim Neumann Nielsenip Akileraartarnermut Aqutsisoqarfimmeersup Adam Rielip misigisai saqqummiussimavai. Inunnut ataasiakkaanut sulianut oqaaseqarsinnaanani ilisimatitsivoq. Kim Neumann Nielsenilli suliaq pineqartoq tulluusimaarutiginagu nassuerutigaa.

- Oqarasuaatikkut saaffiginninnerpassuit suliamillu uteqattaarititaanera eqqarsaatigalugu, innuttaasoq nuanninngitsumik misigisaqarsimaneranik isumaqatigaara. Pitsaanerusumik sullissinissarput sulissutigaarput, suna tamaat nalunngisaqarfigisinnaannginnatsigu, kisianni nalunaarutinik tigusinerput pitsaanerulersittariaqarparput, suleqatittalu ilisimasaqarfiginnittup innuttaasumut attaveqarluni suliaq ajunngitsumik piffissamilu tulluartumi aaqqiivigineqarnissaa qulakkeerlugu, innuttaasup suliaq amerlasooriarluni uteqqaartariaqassanngilaa, Kim Neumann Nielsen ilisimatitsivoq, taassuma naatsoruutit inaarnerannik aaqqiineq ajornaatsuinnaaneq ajortoq, naak avataanit taamaappasikkaluartoq naqissuserpaa.

Allat immaqa taama inissisimasut
Aqutsisoqarfimmi pisortap sulisitsisut it-systemia nutaaq ajornartorsiorfiusimasoq ilisimatitsissutigaa, taamaattumillu allat taamatut Adam Rielitut unammilligassaqarnerat itigartitsissutigisinnaanngilaa..