Oqaatsit
Oqaasileriffiup ordbogit app-inngorlugit saqqummersippai
Oqaasileriffik ukiuni arlalinni app-imik saqqummersitsiniarluni sulissuteqarpoq. Ullumi tallimanngornermit ordbogi aaneqarsinnaalerpoq
Ordbogi kalaallisuumiit qallunaatuumut aamma kalaallisuumiit tuluttuumoortoq, oqaatsinik 38.000-t missaanni imaqartoq, maanna Oqaasileriffimmit saqqummersinneqarpoq.
App-eq maanna App Storemi aamma Play Storemi aaneqarsinnaavoq.
- Ukiuni arlalinni ordbogi saqqummersinniarlugu suliarinikuuarput, piffissap ilaanilu uninngatittarnikuullugu. Maanna kiisami saqqummerpoq. Kisianni app-eq suli piariivinngilaq, atorneqarsinnaalermat ordbogi ullumikkut saqqummiupparput, oqaasileriffimmi pisortaq, Katti Frederiksen Sermitsiaq.AG-mut oqarpoq.
Ordbogimik atuisut oqaatsinik kukkuneqartunik nassaarsimagunik, aaqqiissutissanut siunnersuutinik nassiussisinnaasut, taassuma saniatigut ilisimatitsissutigaa.
- Kukkussut aaqqiissuteqarfigissanerlugu tassani nalilertassavarput, kisianni isumaqatigiinngittoqarpat, oqaatsinik aalajangiisartut aalajangiisuussapput, Katti Frederiksen oqarpoq.
2018-ip aallartinnerani app-i ilaneqassaaq.
- Taanna oqaatsit nassuiaataannut ordbogiussaaq, tassanilu oqaatsit kalaallisut nassuiarneqartassapput, Katti Frederiksen oqarpoq.
Ordbogimik suliniut US National Science Foundationimit aamma Namminersorlutik Oqartussanit aningaasaliiffigineqarpoq.