Sangusaarneq

Nuunu OL-imut peqataassanersoq annikitsuaqqat aalajangissavaat

Sisoraatinik sangusaartartoq Nuunu Chemnitz Berthelsen Ukiukkut OL-ertoqarnissaanut anngunnissaminut suli periarfissaqarpoq. Anngutissangunilu iluatsitsisariaqarpoq

Nuunu Chemnitz Berthelsen
Her ses Nuunu Chemnitz Berthelsen, der stadig har chancer for at kvalificerer sig til Vinter-OL

21-nik ukiulik Nuunu Chemnitz Berthelsen Nuummiu, Ukiukkut OL februarip qaammataani Korea Kujalliup illoqarfiani Pyeongchangimi ingerlanneqartussamut, anngunnissaminut pingasunik suli periarfissaqarpoq.

21. januar anngunniunnissaq killiliunneqarsimavoq, anngunnissaminulli sangusaarnerit pingasut kisiisa amigaatigai.

- OL-ertoqarnissaanut anngutissaguma, Europa Cup-imi punktinik taasat 100-t ataallugit sangusaaqataassaanga. Taakku ajugaasumiit qanoq sivisutigisumik kingulliuneq aallaavigalugu pissarsiarineqartarput. Kinguaqqanermi sekundit aallaavigalugit taakku pissarsiarineqartarput. Immikkoortulli pissarsiarineqartut ikinnerunissaat anguniarneqartarpoq. Suna tamarmi sisoraatinik sangusaarnermik ingerlanneqartarpoq, Nuunu Chemnitz Berthelsen oqarpoq.

Annikitsuaqqat aalajangiisut
Danskit sisorartartut kattuffia, taassuma anngunnissaanut piumasaqaatinik minnerpaaffiliisimavoq.

- Sapaatip-akunnerata siuliani marloriarlunga sangusaaqataavunga. Kukkussuteqarfigisannik sekundi sinnilaarlugu arriippallaalaarsimavunga, kisianni OL-mut piumasaqaatiniit sekundimik sinnilaarsimalllugu. Taammaammat OL-imut peqataanissara annikitsuaqqanit aalajangerneqassaaq, Nuunu Chemnitz Berthelsen oqarpoq.

Tapersersortissaaleqisoq

Piffissamilu kingullermi tapersersortit ikilisimammata iluatsitsissanerluni taassuma qularutigilersimavaa.

- Tapersersortissaaleqeqaanga. Aningaasaliisartut aningaasaliissutsiminnik ikilisaasimammata aningaasaataarutilerpunga. Aningaasat nungunnissaata tungaanut misileraallunga angalasaqattaassaanga. Piffissaq ilungersunarpoq, kisimiittutut misigisimagama, ilaqutaqarpungali uannut tapersersuisunik. Kisianni assut ilungersorpunga stressissutaalersarporlu, 21-nik ukilik piginnaanilik, oqarpoq.

Sangusaarnerni pingasuni marluk iluatsissagai

Taanna novembarip qaammataani sangusaariiartoqattaarluni Østrig, Italien, Sverige aamma Norge angalaffigisimavai.

- Kimiilluni pilersaarusiorneq nukippassuarnik atuinarpoq. Nalunngilarali naammassisinnaallugu. Unamminerit ataanni arlaleriarlunga unammisarsimavunga saniatigullu piffissamik angusarissaarnerpaaffigisannik unammeqataasarlunga. Tamanna unamminerni marloriarlunga iluatseriassavara.

Taamaattoq inernerit stressimit sunnerneqarsinnaapput, periarfissakkalu amerlajunnaarnikuupput. Unammiffissallu pingaarutillit nalaanni eqqarsarluartariaqarpunga, Nuunu Chemnitz Berthelsen ulluni makkuni Norgemiittoq, erseqqissaavoq.

Powered by Labrador CMS