Aningaasanut inatsit
Anstaltbetjentit tanermikkut nappaatillit ilinniassavaat
Sulisut ilinniarteqqinnissaannut aningaasanik immikkoortitsisoqarsimanera Kalaallit Nunaanni Kriminalforsorgenimi pisortaanerup nuannaarutigaa
Nunatsinni isertitsivinni sulisut tarnimikkut nappaatilinnik sullissinerminni akerleriiffiusunilu sakkungissarnerussapput. Tamanna danskit naalakkersuisuisa Dansk Folkepartiillu aningaasanut inatsissasut isumaqatigiissutigisimasaani allassimavoq.
- Nuannaarutigisupilussuuvara. Nuanneqaaq, Kalaallit Nunaanni Kriminalforsorgimi pisortaaneq, Naaja H. Nathanielsen, Sermitsiaq.AG-mut oqarpoq.
Annertuumik pisariaqartitsineq
Aningaasanut inatsimmi 2018-miit 2020-mut tarnimikkut nappaatilinnik sullinneqarnerat pillugu ilinniaqqinninnermut aningaat 900.000 koruunit atugassiatut immikkoortinneqarput, akerleriinnerillu aqunnissaannut pikkorissaanissamut aningaasat 300.00 koruunit immikkoortinneqarluti. Aningaasat taakkua atugassiatut immikkoortinneqarnerisigut Naaja H. Nathanielsenip pikkorissaanissat pisariaqarsorisani ingerlassinnaanngorpai.
- Sulisutsinnut iluaqutaasussamik ikiorsiineruvoq. Immikkoortumilu pisariaqartiffioqisumi ilinniartitseqqiinikkut pitsanngorsaasinnaavugut.
Ilinniartitseqqiinerit Nunatsinni pissutsinut naleqqussarneqassasut, Naaja H. Nathanielsenip nassuiaatigaa. Tassa ajonartorsiutinut ilisimasallit ilinniartitseqqiinermi ilinniartitsisuussapput.
- Sumiiffiit mikinerit pineqarput, ikiorserneqarnissarlu imaasiallaannaq pisinnaaneq ajorpoq. Taamaammat tarnimikkut nappaatilinnik sullitaqarnissaq immikkorluinnaq piumasaqaatitaqarpoq, taanna oqarpoq.
Tarmikkut nappaatillit piffissami sivisunerusumi isertitsivimmiittut
Tarnimikkut nappaatillit nunatsinni isertitsivinniittut allanut inissiffissaqannginneri pissutigalugu Danmarkimi isertitsivinni inissiisarnermiit nunatsinni isertitsivinnut inissinneqartarnerat sivisunerusarpoq.
- Taakku inissinneqarsimasut sullitissagaannik sulisunut piginnaaneqarnerusunik piumasaqaatitaqarpoq. Ilinniartitsinikkut tamanna anguneqarsinnaavoq, massakkulli sulisut sakkussaqalerput.
Isumaqatigiinnerup kingunerisaanik, ukiut sisamat sinnerlugit nunatsinni eqqartuussiveqarfinnut pitsanngorsaaniarluni aningaasat 40 million koruunit immikkoortinneqarsimasut nikisinneqassanngillat.