Royal Arctic Line
Namminersorlutik Oqartussat: RAL-ip suliani iluarsingajalerpaa
Attaveqaqatigiinnermut naalakkersuisup, Erik Jensenip, Royal Arctic Line (RAL) ''piaarnerpaamik suliniutinik, pitsannguinissamik siunertaqarfiusunik aallartitsisisoqarnissaa'' tatigaa.
Erik Jensen umiarsuaatileqatigiiffimmi pisortaaneq Verner Hammeken ataatsimeeqatigeqqammerpaa, umiarsuaateqarfiup atuisullu akornanni tatiginninneq uterteqqinniarlugu qanoq pilersaaruteqarnersoq tusarniarlugu.
Nassiussuinerit nikerartut
Umiarsuaatileqatigiiffik upernaarli nassiussanik piffissaq aamma sumiiffik eqqorlugu tunniussisarnissamut piumasaqaatinut naammassinnissinnaasimanngilaq. Tamanna umiarsuaatileqatigiiffiup umiarsuaannik ajutoornernik, kisianni aamma minnerunngitsumik it-mik aaqqissuussaanerup nutaap eqqunneqarneranik pissuteqarpoq.
Suliffeqarfippassuit – minnerit annerusullu – RAL-mik annertuumik ajornartorsiuteqarput, inuit allaat ikinngutiminnut ilaquttaminnullu nerisassanik nunani allaniittunut nassiussiniaraluit eqqorneqartarput.
Ingerlatseqatigiiffik Namminersorlutik Oqartussanit pigineqartoq alla, KNI-p pisortaanera, qanittukkut sakkortuumik RAL-mut isornartorsiorpoq, tamatumalu kinguneranik Erik Jensenip Verner Hammekenip ataatsimeeqatiginissaanik qisuariartippaa.
KNI-p akisussaaffini naammassisinnaanngikkaa
KNI-mi pisortaanerup kiffartuussinissamut isumaqatigiissut akisussaaffigisani naammassisinnaajunnaarpaa, tassani Nunatsinni nioqqutissaqarnissaanik qulakkeerinnittussaatitaavoq. Tamannalu RAL-ip nioqqutissat nassiussinnaanerannut qularinninnermik pissuteqarpoq.
- KNI-p tusagassiorfitsigut saqqummiussereernerata kingorna ilisimatinneqarpunga, Royal Arctic Linep KNI 31. oktober 2017 ukiuunerani pilersuinerit inissinnissaasa qulakkeerneqarnissaa pillugu ataatsimeeqatiginiarlugu qaaqqusimavaa, suleqatigiinnissaammi pisariaqarluinnarmat – inuiaqatiigiit pillugit – taamaattumik isumalluarpunga, Erik Jensen tusagassiuutinut nalunaarut naapertorlugu oqarpoq.
Pitsannguuteqangajalersoq
- Uanga Naalakkersuisoqarfimmalu pissutsit ineriartornerat malinnaaffigilluarpavut, aammalu piffissap sivisitsup ingerlanerani malunnaatilinnik pitsannguisoqarnissaa naatsorsuutigaarput, Erik Jensen tusagassiuutinut nalunaarummi oqarpoq.
''Piffissap sivikitsup ingerlanerani'' oqaatigigamiuk suna pineqarnersoq erseqqissartinniaraluarlugu, Sermitsiaq.AG-p tallimanngornermi Erik Jensen pissarsiarisinnaanngilaa.