eqqakkat

Atoqqiinermut containerit Piorsaavimmit aamma Kofoeds Skolemit akisussaaffigineqalissapput

Kommuneqarfik Sermersuup atoqqiinermut containeriutai nuannarineqarluartut 1. novemberimiit Piorsaaviup Kofoeds Skole'llu eqqaannut nuunneqqassapput

Møbler og andre genstande der afleveres til genbrug, skal ikke længere afleveres ved affaldscenteret i Nuuk.

Containerit 20 fodsit marluk Nuummi Ikuallaaviup eqqaaniittut; pequtinik allanullu atorluarneqartaqisut, illoqarfimmi sumiiffimmut allamut nuunneqassapput.

Kommuneqarfik Sermersooq paasissutissiivoq, atoqqiinermut containerit Piorsaaviup aamma Kofoeds Skolep silataannut novembarip aallaqqaataani nuunneqassapput. Piorsaaviup aamma Kofoeds Skolep adresseraat Industrivej 2A aamma 2B.

Taamaattumik atoqqinneqarsinnaasut igitassallu siunissami immikkoortiterluarneqartalertussanngorput.

Angallanneq annertooq

- Containereqarfiup eqqaani angallanneq isumannaallisaanerup peqqissutsillu tungaatigut ajornartorsiortitsisarpoq, biilimmi eqqakkanik oqimaatsunik usilit tunniussiartortut angallattarput. Tamatuma saniatigut ilaqutariippassuit meerartallit pequtinik aallinngikkunik tunniussiartortarput. Taamaammat sorpassuit soorlu pequtit atoqqinneqarsinnaalluartut igitassat eqqaanni inissisimasarput. Tamanna takussunarpoq, atoqqinneqarsinnaalluartullu pitsaanerusumik isumagineqartariaqarput. Isumaqarpugut akisussaaffik tamanna Piorsaavimmit aamma Kofoeds Skolemit ingerlalluarneqarsinnaasoq, Frank Rasmussen Kommuneqarfik Sermersuup Sanarfinermut Avatangiisinullu Ingerlatsiviani ingerlatsisoq oqarpoq.

Kommuneqarfik Sermersuumi kommunalbestyrelsimut ilaasortaq isumaqarpoq, nuussiniarneq isumatusaarnerusoq, taakkununngalumi orniguttartut ataavartumik suliassaqarnissaannut aamma iluaqutaassasoq.

Iluarsaassinerit atoqqiinerillu

- Taakkununnga orniguttartut pequtinik igiinnarneqartussaagaluanik iluarsaasinnaammata atoqqiisarnerput taamaalilluta annertusisinnaanngussavarput. Tamanna Kommuneqarfik Sermersuup avatangiisinik eriaginninnermik pingaartitsineranut naapertuulluinnarpoq, aamma Eqqakkanik Tigooraviup eqqagalerineq taamaallaat ukkatarilersinnaanngussavaa, Sanarfinermut Avatangiisinullu Ataatsimiititaliami siulittaasoq Malene Lynge (IA) oqarpoq.

Kommunip paasissutissiivoq, atoqqiinermut containerit ammasarfissaat qaqugukkullu tunniussivigiartorneqarsinnaajumaarnersut Piorsaavimmit aamma Kofoeds Skolemit nammineq aalajangerneqarumaarput. Tunniunneqartut igitassatut nalilerpatigit tigunissaannut itigartitsinissaminnut pisinnaatitaaffeqassapput. Igitassatullu nalilikkat Eqqakkanik Tigooraavimmut tunniukkiartorneqartassapput.

Powered by Labrador CMS