malittarisassat
Aqumiunut piumasaqaatit suli sukateqqinneqarput
Malittarisassat malinneqarnersut paasiniarlugu maannamut maskiinalerisut naalagaat kilisaatini inuttat ilaattut naatsorsuunneqarneq ajoraluarput. Nalunaarummi nutaami maanna tusarniaatigineqartugut taakku ilanngunneqartalissapput. Tamanna Sulisitsisut akissutaani atuarneqarsinnaavoq, taakku sakkortuumik sukaterinissanut aarlerisaaripput.
Sulisitsisut aalisarnermut piniarnermut naalakkersuisumut tusarniaanermut akissuteqaataanni takuneqarsinnaavoq, maskiinalerisut naalagaat aamma maskinmesterit ilanngunneqartalissasut soqutigasaqartut kattuffiata paasisimagaa.
Annertuumik sunniutilik
Taakku maanna inuttat pillugit malittarisassat sinaakkutaannut ilanngunneqarpata inuussutissarsiornermut annertuumik sunniuteqarsinnaavoq. Taakku nunaqavissut sulisorilernissaat ajornakusoorluinnangajannerat pissutaalluni, tamatumalu umiarsuaatileqatigiiffiit ajornerusumik inissisimalertissavaat.
Nalunaarummi nutaami atuarneqarsinnaavoq, aqumiut ullumikkut 60 procentiusussaniit 90 procentii Nunatsinni minnerpaamik ukiuni marlunni akileraartarlutillu najugaqarsimanissaat januaarip aallaqqaataani 2020-mi piumasaqaataalissasoq.
Aqumiut inuttat makku ullumikku ilanngunneqartarput: angallatip naalagaa, aquttut, igasut, trawlbas, tunisassiorfimmi aqutsisut aamma formandit.
Nunani avannarlerni ataatsimut isumaqatigiissummik saqitsaassisut
Tusarniaanermut akissummit Sulisitsisut isumaqarput, Naalakkersuisut Nunani Avannarlerni ataatsimut akissaatitigut isumaqatigiissutinik ataatsimoorussiniaernermut saqitsaassisut. Isumaqatigiissut kingullermik 1982-imi iluarsaanneqarsimavoq, Nunarpullu tassani ilaavoq.
- Tamanna peqqissaartumik inatsisitigut misissoqqissaarneqartariaqarpoq, Sulisitsisut naqissusiipput, taakku siunnersuut tamakkiisumik nunaqavissut inuttanngornissaannut tamanna siunnersuutaanerarpaat. Kilisaatini inuttat nalinginnaasumik ullumikkut aqumiut arfineq-pingasut aamma qulingiluaakkajuttarmata. Inuillu qulingiluat 90 procentii isumaqarpoq qulingiluat nunaqavissuusariaqartut.
Aningaasaqarnikkut eqqugaassasut
Aalisarneq aamma umiarsuaatileqatigiiffiit aningaasaqarnikkut eqqugaassapput, taamaalillutillu inuiaqatigiit isertitaat aamma, Sulisitsisut aarlerisaaripput, taakku naammattumik Nunatsinni ilinniartoqartannginneranik ajornartorsiutit uppernarsarpaat.
Savalimmiunut assersuussinerup takutippaa, Savalimmiuni ilinniarsimasut atorneqartartut affaat anguneqassappata, Namminersorlutik Oqartussat imarsiornermik ilinniarnermut aningaasat marloriaataat millionit aningaasaliissutigisariaqaraat.
Amerlasuut soraarninngulersut
Aqumiut inuttat sulisut 33 procentii ukiut qulit qaangiuppata soraarninngussapput, taarserneqarnissaannullu naammattunik ilinniartoqanngilaq. Aammattaaq amerlanerusut tuluttut misilitsittariaqannginnermut immikkut akuerineqarsimapput. Tamatuma nunat tamalaat imartaanni angalanissaannut aporfeqartissavaat, kilisaatillu 24 meterinit takinerusut taamaaliorajuttarput.
Uani linki ataaniittoq atorlugu aamma Sermitsiaq atuaruk, tassani Royal Greenlandip Karl-Kristian Krusep ilinniarneq ilinniartoqarfik aalluttariaqaraa kajumissaarivoq, nunatsinni aqumiut pisariaqartinneqartut pissarsiarineqarniassammata.
Kajumissaarut: Imarsiornermik ilinniarfiit amerlanerusunik aningaasaliiffigisigit
Royal Greenland: Mattussinngilagut - ammaassivugut