katinneq
Michelinimi ingasup aappariit tupaallatsikkai
Nunarsuarmi iggarinnerpaanik iggavimmi ikiorteqarnissaq ulluinnarsiutaanngilaq. Tamannali aappariit misigaat.
Igasut tallimat Danmarkimi neriniartarfimmi nunarsuarmi tusaamasaasumit Nomameersut Kalaallit Nunaanut tikeraaqqammerput. Igasut taakku tallimat Narsarsuarmeeriarlutik Nuuk aqqusaariarlugu naggataagut Ilulissaniinnerminni Nunatsinni pinngortitamik paasisaqarluavissorput.
Nuuk Ugeavis allappoq.
Piffissap taamaalinerani naasut nerisassiornermi atorneqartartut nasullu allat pupiillu imaaliallaannarluni katersoriaannaasarmata Rene Redzepi suleqataalu ulluni arlaqanngitsuni Kalaallit Nunaanniinnerminni nerisassiassatut misilitaat ikittuinnaanngillat.
Kalaallit Nunaannit nassiussat
Igasut Kalaallit Nunaanniinnerannut pissutaasut ilagaat kalaallimut aalisartumut Vittus Jerimiassenimut tikeraarusunnerat. Aalisartormi taanna isumaqarami aalisakkat tunineqartartut akikippallaartut, naak pitsaassusaat ajunngilluinnaraluartut, taava neriniartarfik Danmarkimiittoq Noma saaffigaa aalisakkat pisarisartakkami ilaannik piserusussinnaanersoq paasiniarlugu.
Noma neriniartarfiummat nerisassiassanik suugaluartunilluunniit iggavimminnut pisiortortuunngitsoq, Vittu misiligutigineqartussanik neriniartarfimmut timmisartukkut nassiussissasoq isumaqatigiissutigineqarpoq. Nassiunneqartut pitsaassusaat Rene Redzepimit
nuannaarutigineqartorujussuupput taamaalillunilu isumaqatigiissutigineqarluni taanna suleqatini arlallit peqatigalugit maanngarluni nerisassiassat suminngaanneersuunersut takuniassagai.
Nalaatsornikkut pisoq iluatsilluartoq
Angalanissaat upernaaq pilersaarusiorneqarmat juulimi pisussanngorlugu aalajangiunneqarpoq. Tamannali qaammammik ataatsimik kinguartinneqarluni. Taamaalillunilu Augusta aamma Vittus Jerimiassenikkut ukiunik 33-nngortorsiorlutik katiffissiornerisa nalaani pisussanngorluni. Nuliariit taakkua ernerat Aqissiaq nuliassaminut Daisymut ulloq taanna katinniarluni aalajangersimavoq. Pilersaarutigineqartut naapertorlugit ulloq katiffissaat aqaguppat igasut Nomameersut angallammik
angalaaqataasussanngorput, taamaalillutik aalisakkat sumi pisarineqartarnersut takusinnaaniassammassuk.
Timmisartumilli angalanerat kinguaattoorfiummat igasut aggustip pingajuanni kingusissukkut aatsaat tikipput. Taamaalilluni igasut Augusta aamma Vittus Jerimiasenikkunnut ullaap tungaani igaassanik takuniaassasut isumaqatigiissutigineqarpoq.
Igasut sungiussisimasut
Augusta Jerimiassen tamulugassanik katittut naammassippata sassaalliutissanik ullaap tungaani piareersaasussaavoq. Igasulli igaassanik takuniaasussaammata taakkununnga aallarniutigalugu piareersaaqatiginissaat pitsaalluinnassasoq taanna eqqarsarpoq. Taamaattumik igasut takkunnissaannut suut tamaasa piareersarpai – suliassaminnullumi akuersaarluarput. Igasut
marluk asimukartillugit naasunik nerineqarsinnaasunik pinnersaatigineqartussanik katersiartortinneqarput, igasullu sinneri marluk René peqatigalugu iggavimmi piareersaallutik aallartillutik.
– Sungiussisimalluinnarlutik atugassatik amusartuni sikaavinnilu nanisarpaat, Augusta Jerimiassen oqaluttuarpoq.
Angerlarsimaffimmi katittut
Kommunalbestyrelsip ataatsimiittarfia nutarterneqaleruttormat tassani katittoqarsinnaanngimmat katittussat borgmester Asii Chemnitz Narup angerlarsimaffimminni katinnissaminnik isumaqatigissuteqarfigisimavaat. Taamaattumik qaaqqusat katinnermi peqataasut iggarissorsuit Michelinimik ulloriannassimasut suliaannik mamarluinnartunik tupaallaatissinneqarput. Tamanna
katittuni peqataasut tupaallaatigaat nuannaarutigeqalugulu.
Angallammik angalaarnissamut piffissaqartut
Igasut Nomameersut katittuni persuarsioqataanngimmata angallammik ualikkut angalaaqataasinnaasut isumaqatigiissutigineqarpoq. Nuannisaqalutillumi angalaarput saarullinnik qaleralinnillu aalisarlutik. Angalaareerlutik René Redzepi igasullu nunanit ukunaneersut Japan, Canada, Tyskland aamma Danmark angerlarsimaffiannut igajartoqataaqqipput.
Saarullinnik qaleralinnillu misiligutissanik soqutiginarluinnartunik sassaalliutissatut assigiinngitsunik piareersarneqartunik suliaqarput. Ilaatigut Augustap aamma Vittup saarulliit tinguinik aqajaruinillu nerisassiaat René Redzepip mamarilluinnarpai.
Suleqatigiilluarnissaq neriuutigineqartoq
Tikeraarnerat ataatsimut isigalugu iluatsilluarpoq aamma Augustap Vittus Jerimiassenillu neriuutigaat ilimagalugulu neriniartarfimmut aalajangersimasumik tunisisarnissaminnik pitsaasumik isumaqatigiissuteqarsinnaassallutik. Taamaattumik nuliariit taakku Nuummeersut neriuutigaat Noma Københavnimi neriniartarfittaassamini ammaqqippat nerisassat allassimaffianni Kalaallit Nunaat ilaatinneqaqqilissasoq. Tamanna qaqugorpiaq pissanersoq suli nalunarallarpoq, neriniartarfilli taanna Illu Atlantikumiikkaluartoq upernaarli matuneqarpoq.
Paasisat:
Neriniartarfik Noma nunat avannarliit iggaviat najoqqutaralugu 2003-mi ammarneqarmat kikkunnit tamanit oqallisigineqalerpoq. Iggaviani nerisassiarineqartartut tamarmik Atlantikup avannaaneersullutillu Skandinaviameersuupput. Neriniartarfiup Danmarkimi siullersaalluni Michelinit ullorissat marluk pilerigineqaqisut pissarsiarai arlaleriarlunilu neriniartarfiit nunarsuarmi pitsaanersaattut toqqagaasarluni. Nomami nerisassat allattorsimaffianni ilaatigut umimmak aallaqqaammut ilaagaluarpoq. René arlalinnit asissorneqarluni puisinik kujannittartutut allanillu atequsersorneqartarpoq, tamakkuli kingusinnerusukkut kanngusutsinneqarlutik.
Ukiut pisoqarfiusut:
- 2003: Neriniartarfik Noma René Redzepi aamma Mads Refslund igasuni naalagaliullugit ammarneqarpoq
- 2005: Noma siullermeerluni Michelinimik ulloriannappoq
- 2007: Noma aappassaannik Michelinimik ulloriannappoq
- 2007: Noma siullermeerluni nunarsuarmi neriniartarfiit pitsaanerpaat allattorsimaffiannut ilannguppoq
- 2010: Noma nunarsuarmi neriniartarfiit pitsaanersaattut toqqarneqarpoq
(taamalu pisoqaqqilluni 2011-mi, 2012-imi aamma 2014imi) - 2017: Noma Strandgade 93-imiittoq matuneqarpoq
- 2018: Nomap Refshalevejimi Sømindedepotimi Christianiap eqqaaniittumi ammaqqinnissaa naatsorsuutigineqarpoq
Nuuk Ugeavis digitalinngornngorlugu pissarsiariuk: