Arctic Guardian
Sungiusarneq pileruttorpoq: Takornariartaat kivisimasoq
Ajutoorfimmut apuutinngitsiarnermi Vædderenip umiarsuup kivisimasup annanniutaasa ilaat toraarpaa. Taama amiilaarnartumik atlantikumi sungiusarnermi piviusuusaartitsisoqarpoq, pisullu nalaani Sermitsiaq.AG Vædderinimi ilaavoq.
Vædderen massakkut nalunaaquttap akunnera affaalu, islandiumiut sinerissami alapersaarsuutaata Thorip orneqqullugu paasissutissiarisimasaanut, ingerlaareersimalerpoq.
Danmarksstrædi
Nalunaaqutaq 11.30-nngorpoq, susoqarsimaneranillu paasissutissanik amerlanerusunik pissarsisimasoqalerluni. Umiarsuaq takornariartaaq Tasiilamiit Islandimut ingerlaartoq ullaassakkut apuutereersimasussaangaluarpoq; umiarsuarlu periarfeerunneqarsimavoq. Umiarsuup kingullermik takuneqarfia Danmarksstrædip avataani ippassaq ualisoq takuneqarsimavoq.
Umiarsuup kivisimanissaanut aarlerussuteqarnissamut pissutissaqarpoq. Arctic Guardianip ullormi siullermik sungiusarluni ingerlanneqarnerani taama piviusuusaartitsisoqarpoq.
Umiarsuit sineriammi alapernaarsuutit sisamat Canadamiit, USA-miit, Islandimiit Norgemiillu umiarsuup kingullermik takuneqarfianut aamma ornigupput.
Attaveqatigiinneq ingerlaavartoq
VHF-radiokkut attaveqarniarnerup ajornakusoorfiusimasoq, umiarsuit imminnut qanillineranni massakkut ingerlaavartumik attaveqatigiinnerit ingerlanneqarput.
Canadamiut umiarsuaataat Pierre Radisson, paatsuungassaanngitsumik franskisut allamiorpaluuteqarlutik ilanngupput. Taakku qulimiguulik qaamiorivaat summiiffillu umiarsuup takuneqarfigisimasaanut ujaasitinneqariartoqqammerpoq.
Islandimiut umiarsuaataata Thorip ujaasinermi ataqatigiissaarisutut akisussaasuuvoq. Umiarsuaq takornariartaavoq takuneqarfimminit kingullermi Danmarksstrædip Islandillu nalaani kivisimasinnaavoq.
Umiarsuup alapernaarsuutip Vædderenip sumiiffimmi sorlermi ujaasissanerluni nalunaarfigineqarnissartik utaqqivaat.
Umiarsuup aquttarfiata saani vagtchefip umiarsuaq aquppaa. Aquttarfiullu tununnuganiippoq sulinermut qitiusoqarfik. SAR-imillu suliaqarnermi – sakkulersortoqassatilluguluunniit – tamaani aalajangiinerit tamarmik tamaani pisarput.
Annanniut toraarneqartoq
Vædderenip ornitassaminut apuutinngitsorluunniit nasiffimmiit mallit akornanni annanniut toraarneqarpoq. Annanniut mallinit qummukartinneqarnerit tamarluinnaasa takuneqarsinnaalersarpoq.
Sulinermi pisortaq umiarsuup iluani kalerrisaarivoq. Umiarsuup umiatsiaq pullattagaataata aappaa piareersarneqarpoq annaassiniartarlu annanniutinik atisalersorlutik.
Umiarsuup annanniutip kaavinnerata nalaani, umiatsiaq pullattagaq annaassiniartartunik sisamanik ilaasoqartoq imaanut siginneqarpoq, umiatsiallu annanniummukartinneqarluni. Annanniut toraarneqarnerminiit nalunaaquttap akunnerata affaa ingerlareersoq, umiarsuarmut qaqinneqarpoq. Sungiusarnerunngikkaluarpalluunniimmi annanniummiittut taama pineqassangaluarput.
Ujaaseqqinnissarlu ajornartorsiuteqarpoq. Islandimiut umiarsuaataat, annaassiniarnermut aqutsisuusussaq annanniutip toraarneqarfigisaaniit ungasippallaamut ingerlasimavoq. Thorimut attaveqarniarneq ungasissumiilersimammat ajornakusoortinneqarpoq.
Nalunaaquttap akunnerata affaa ingerlaqqereersimalerpoq sulilu ujaasinissaq aallartinneqarsimanani.
Piffissap ingerlanerani Vædderinimi annanniummiuttunit paasitinneqarsimapput imaani annanniutinik allanik suli tallimanik peqartoq. Taakkunannga marluk annanniutip uuma imaanut siginneqannginnerani siginneqarsimapput. Allallu pingasut kingulliusimallutik. Taama pisoqarnerata nalaani umiarsuaq takornariaqartaat suli ingerlaarsimammat annanniutit pingasut sumi singinneqarsimasut paasissutissartaqanngilaq.
Attaveqaatitigut ajornartorsiuteqarneq
Islandimiut umiarsuaataannut attaveqarniarnerup ajornartorsiutitaqarnera pissutigalugu, annaassiniarnermi ataqatigiissaarineq Thorip akisussaatinneqalerpoq.
Annanniutip sumiiffigisaa aammalu anoraa- sarfallu pissusaat aallaavigalugit annanniutit allat sumiiffigisinnaasaat naatsorsorsimavaa. Sumiiffik umiarsuarnut tamanut ujaasiffigineqartussanngorlugu kipparissumik nalunaaqutserneqarpoq.
Pisortap sukangasumik nipeqarluni umiarsuit allat sisamat sumunnarnissaanik nalunaaruteqarfigai.
Tamarmik piareeqqasut
Tamatuma kinguninngua umiarsuit tulleriillutik piareeqqanertik nalunaarutigaat. Aammattaaq timmisartut pingasut ujaasitinneqarput.
Massakkut annanniutit tallimat amigaatigineqartut ujarneqaleruttorput.
Aamma atuaruk: Sungiusarneq: Vædderen ajutoorfimmukartoq