ajunaarnersuaq

Aajuku inuinnarnit maannamut tunissutigineqarallartut

Uummannap eqqaani eqqugaasunut maanna 1 millionit koruunit sinnerlugit tunissuteqartoqareerpoq. Sermitisaq.AG-p sianeqattaarluni paasiniaarnerata tamanna takutippaa.

Uummannap eqqaani tassaarsuarmut eqqugaasunut tunissuteqarnissaq ataasinngormalli periarfissaalerpoq.

Nunatsinni innuttaasut Grønlandsbanken, BankNordik aqqutigalugit tunissuteqarsinnaapput, SMS-ikkullu Tele-Post aqqutigalugu tunissuteqartoqarsinnaalluni.

Sisamanngornermi ullaap tungaani qanoq amerlatigisunik maannamut tunissuteqartoqarsimanersoq paasiniarlugu, Sermitsiaq.AG paasiniaalluni sianeqattaarpoq, imaakkallarpullu:

  • Grønlandsbanken: 921.113,28 koruunit
  • BankNordik: 45.488,65 koruunit
  • Tele-Post: 35.000 koruunit missaat

Aningaassat pingasunit qulaani taakkartorneqartunit katersorneqartut maanna katillugit 1.001.601 koruunit missaanniipput.

Kalaallit Røde Korsianni generalsekretæri, Kirsten Mortensen, illuatungeriillutik katersuiniarnerpassuit amerlammata nuna tamakkerlugu katersuiniarnermik aallartitsisimanatik, Sermitsiaq.AG-mut ilisimatitsivoq.

- Maani pissarsiarisagut Røde Korsip ingerlatseqatigiiffiinit allaninngaanneerput. Inunnit aningaasanik pissarsinngilagut. Aningaasat Kalaallit Røde Korsiannut tunniunneqartut, oqartussanut eqqortunut, Avannaata Kommunianut aamma Namminersorlutik Oqartussanut ingerlateqqinneqartarput. Taakkua aningaasat qanoq agguataarneqassanersut isumagisarpaat, taanna oqarpoq.

Danmarkimi katersuiniarnermi maanna 300.000 koruunit qaangerneqareersut, tamatuma saniatigut ilisimatitsissutigaa. Aningaasat taakku Kalaallit Røde Korsiannut nuunneqassapput.

- Savalimmiormiut Røde Korsiannit aamma 200.000 koruuninik pissarsinikuuvugut. Canadamiut aamma Røde Korsiannit aningaasannannissarput naatsorsuutigaarput, Kirsten Mortensen oqarpoq.

Powered by Labrador CMS