Universitetimi rektori

Rosing oqaatsinut piumasaqaat pillugu: Suliamut tulluartumik piginnaasalik pingaarnerpaavoq

Ilisimatusarfimmi rekoritut atorfik, ''piginnaasat tamakkiisut'' aallaavigalugit inuttalerneqassaaq. Inuttassarsiorneqarneranilu universitetimi siulersuisut kalaallisut oqaatsit atorneqarsinnaanerinik piumasaqaatinik killilersuinianngillat.

Professor Minik Rosing, Ilisimatusarfimmi siulersuisunut siulittaasoq, sooq atorfimmut rektorissarsiornermi allagartaliussamik kalaallit oqaasiinik oqaaseqarnissamik piumasaqaateqannginnera nassuiarpaa.

Universitetimi rektorissarsiornermi pineqartup kalaallisut oqalussinnaanissaanik piumasaqaateqanngitsumik ujaasineq ilisimaarilluarlugu ingerlanneqartoq, siulersuisuni siulittaasoq Minik Rosing ilisimatitsivoq.

Aamma atuaruk: Rektorimik nutaamik atorfinitsitsiniarnermut politikeri akuliuttoq

Rektorinngortussap kalaallisut oqalussinnaanissaanik piumasaqaateqartoqannginnera ''assut akueriuminaattoq'', IA-mi politikeri Mimi Karlsen, Inatsisartunut ilaasortaasoq tusagassiuutinut nalunaaruteqarnermini oqaaseqarpoq.

- Ilisimatusarfik tassaammat nunatsinni ilisimatuussutsimik qaffassaasussaq, nunatsinni naleqartitatsinnik aammalu oqaluttuarisaanitsinnik ilisimasaqarfiusussaq soorunami pingaaruteqarpoq pisortassap kalaallisut paasinnillunilu oqalussinnaanissaa.

Atorfimmut allagartaliussaq siulersuisut tamarmik isumaqataaffigigaat, Minik Rosing, Ilisimatusarfimmi siulersuisunut siulittaasoq Sermitsiaq.AG-mut ilisimatitsivoq, taanna ima allaqqavoq:

''Kalaallit oqaasiinik ilisimasaqarneq pitsaaquteqassaaq, kisianni piumasaqaataanngilaq.''

Aamma atuaruk: Atorfimmut allagartaliussaq

- Suliamut pisinnaasat ataatsimoortut atorlugit rektorimik nutaamik atorfinitsitsinissarput kissaatigaarput. Oqaatsit immikkut piumasaqaatigalugit qinnuteqartut piumasarinagit nalunaarutiginianngilarput. Universitetinimi rektoriusinnaasut amerlanngillat, Minik Rosing oqarpoq.

''Kikkut tamarmik soqutigisaat''
- Inummik suliamut pitsaasumik aamma pikkorissunik kandidatinik kalaallinut inuiaqatigiinnut tunniussisinnaasumik peqarnissarput kikkut tamarmik soqutigisarisimassavaat, siulersuisunut siulittaasoq oqarpoq, taassuma atorfimmut allagartaliussami kalaallit oqaasiinut ilisimasaqarnissamut tunngasoq oqaasertaliunneqartoq mianernartuusoq ilisimalluarpaa.

- Kalaallit oqaasiinut tunngasut tamarmik misigissuserpassuarnik saqqummersitsisarput. Tamanna ilisimavarput. Taamaattumillu aamma piukkunnarnerpaamik nassaarnissamik kissaateqarneq, siulersuisunit tamanit isumaqataaffigineqarnissaa pingaartinneqarsimavoq, Minik Rosing nassuiaavoq, taassuma soorunami kalaallisut oqaaseqartumik eqqortunillu piginnaasalimmik qinnuteqartumit atorfinittoqarnissaa nuannaarutigissavaa.

Siulersuisut katitigaanerat
Siulersuisunut ilaasortat ukuupput:

  • Professor Minik Rosing, siulittaasoq (Københavns Universitet)
  • Cand. phil. Karo Thomsen Fleischer, siulittaasup tullia (Perorsaanermik Ilinniarfik / SPS Ilulissat)
  • Prodekan Anne Marie Pahuus (Aarhus Universitet)
  • Professor, dr. phil. Malan Marnersdóttir (Færøernes Universitet)
  • Professor Ross Virginia (Dartmouth University - New Hampshire, USA)
  • Tuniniaanermut pisortaq Malik Hegelund Olsen (Royal Greenland A/S)
  • Lektor Flemming Nielsen, bachelor,-kandidat-, master- aamma ph.d.-imi ilinniarfinni ilisimatuunit ilinniartitsisuniillu toqqarneqartoq
  • Atorfimmut aalajangersimasumut ilinniakkami ilinniartitsisoq Mariia Simonsen, atorfininnissaq siunertaralugu bachelorinngorniarnernut aamma kandidatinngorniarnermi ilinniarfinni ilisimatuunit ilinniartitsisuniillu qinigaq
  • Ilinniartoq Aka Bendtsen, bachelor,-kandidat-, aamma ph.d.-imi ilinniartunit qinigaq
  • Ilinniartoq Nivi Møller-Sørensen, atorfininnissaq siunertaralugu bachelorinngorniartunit qinigaq
  • Atuagaatilerisoq Bolethe Olsen, teknikkikkut-allaffissornikkut sulisunit qinigaq

Nutaamik atorfinittoq
Tine Pars apriilip aallaqqaataa aallarnerfigalugu peqqissutsimut naalakkersuisoqarfimmi pisortatut atorfininniarluni aalajangermat, rektoritut atorfik inuttaqarunnaarpoq. Ukiut arfineq-pingasut tassani rektoriusimagaluarpoq.

Rektoritut atorfik januaarip aallaqqaataani 2018-imi inuttalerneqarnissaa naatsorsuutigineqarpoq, tamanna atorfimmut allagartaliussami atuarneqarsinnaavoq.

Powered by Labrador CMS