ataatsimeersuarneq
Paatsiveerusimaarneq: GHF-mi kina siulittaasunngussava?
Arfininngorpat Kalaallit Nunaanni Assammik Arsaattartut Kattuffia Nuummi ataatsimeersuassaaq, mannalu tikillugu kina siulittaasutut qinigassanngortittumik nalunaarutiginnittoqarsimanani.
Nuka Olse Berthelsenip siulittaasutut ingerlaqqinniarani aalajangernerata kingorna, Kalaallit Nunaanni Assammik Arsaattartut Kattuffiat nutaamik siulittaasortaassaaq.
Kattuffik arfininngorpat Nuummi ataatsimeersuassaaq, Nuka Ole Berthelsenilu aqutsisutut kimit paarlanneqassanersoq apeqquterujussuuvoq.
Kattuffimmummi kina imminut siulittaasutut piukkunnerluni suli nalunaaruteqartoqarsimanngilaq.
Atuaruk: GHF-imi siulittaasoq tunuarpoq
Meeqqat ineriartornerat pingaarutilik
Arnat nunanut allanut unammisartuisa sungiusaasuat, Johannes Groth Sermitsiaq.AG-p oqaloqartigisimavaa. Siulittaasunngortussap meeqqat ineriartortinneqarnissaanik pilerusiunneqarnissaat, taassuma neriuutigaa.
- Isumaqarluinnarpunga, Nunatta sineriaani tamani meeqqat ineriartorinneqarnissaat pilersaarusiuunneqartariaqartoq, aammattaaq timersuummut ilaasortarineqartut amerlisarneqarnissaat sulissutigineqartariaqartoq, Johannes Groth oqarpoq nangillunilu:
- Siunissami pikkorissunik unammisartuuteqassagutta, meeqqat ineriartortinneqarnerat pitsaanerusumik sulissutigisariaqarparput, taanna Sermitsiaq.AG-mut oqarpoq.
Kattuffiup suleqatiginera iluarisimaarlugu, taanna naqissusiivoq.
Kina siulittaasutut qinigassanngortissimanersoq tusarsimanagu, Johannes Groth paasissutissiivoq.
Ataatsimeersuarneq Kalaallit Nunaanni Timersortartut Kattuffiani ingerlanneqassaaq.