aatsitassat

Aatsitassanit iluanaarutit meeqqanut ernuttanullu qulakkeerneqassapput

Kalaallit Nunaata Aatsitassarsiornermi Aningaasaateqarfiani aningaasat aningaasartuutitut atuinnarneqannginnissaannut pitsaanerusumik illersorneqassapput. Inatsimmik allanngortitsinerup tamanna qulakkiissavaa.

True North Gems Greenland, TNG, rubinmine, Qeqertarsuatsiaat

Aatsitassat soorlu atortussiassat aamma uulia ataasiaannarlutik piiarneqarsinnaapput. Taamaammallu aatsitassanit iluanaartutit nunap ulluinnarni ingerlanneqarneratut aningaasartuutituinnaq atorneqartariaqanngillat, siunertanut ungasissoq eqqarsaatigalugu iluaqutaasussanuinnaq atorneqartariaqarput.

Tamanna 2008-mi aatsitassarsiornermi anigaasaateqarfimmut inatsimmik akuersisoqarmat tamanna tunngaviusumik eqqarsaataavoq, aatsitassanik ujarlernermi aamma piiaanermit isertitat tassunga tutsinneqartassallutik.

Inatsilli maanna sukanneqassaaq, taamaalilluni aningaasaateqarfimmi aningaasaatit tigummiinnarneqartassallutik, kinguaariit tulliuttut iluaqutigisinnaaniassammatigit.

Inatsisimmi allanngorneqarnerata aningaasaateqarfimmit erniat kisiisa aningaasanut inatsimmut imaluunniit nuna Danmarkimit akisussaaffinnik tigusineranut atatillugu atorneqartarnissaat kingunerissavaa. Aningaasaatit immikkut iliornikkut kisimi atorneqarsinnaasassapput.

Inatsit atuuttoq naapertorlugu tunngaviusumik aningaasat atorneqarnissaat periarfissaavoq, taamaattumillu aningaasaateqarfik imaarukkiartornissaanut ernumanartortaqarsinnaalluni.

Allannguutissatut siunnersuut maleruagassanut norskit uuliamut aningaasaateqarfianut atuuttunut assinguvoq.

Siunnersuut juunip 23-ata tungaanut tusarniaaffigineqarpoq.

Powered by Labrador CMS