namminiilivinneq

Tunngaviusumik inatsisissaq pillugu isumalioqatigiissitaq maanna inissinneqarpoq

Tunngaviusumik inatsisissaq pillugu isumalioqatigiissitaq sulilernissaminut maanna piareerpoq. Naatsorsuutigineqareersutut Vivian Motzfeldt (S) siulittaasunngorpoq. Ane Hansen (IA) siulittaasup tullerissavaa.

Suka K. Frederiksenip (S) Vivian Motzfeldt (S) tunngaviusumik inatsisissaq pillugu isumalioqatigiissitami siulittaasutut toqqarpaa.

Nunatsinnut tunngaviusumik inatsisissamik allalluni sulineq aallartissaaq.

Imaluunniit eqqornerusumik oqaatigalugu: Tunngaviusumik inatsisissanik marlunnik allattoqartussaavoq, tassa Kalaallit Nunaata Naalagaaffeqatigiinnerup iluaniinnerani atuuttussaq, ataaserlu Kalaallit Nunaanni namminersulivissimasumi atuuttussaq.

Namminiilivinnissamut naalakkersuisup, Suka K. Frederiksenip (S) ullumi tunngaviusumik inatsisiliornissamut isumalioqatigiissitaq Vivian Motzfeldt (S) siulittaasoralugu pilersippaa, suliassallu tamatuma pingaarnersaanera isertuutinngilaa.

Atuaruk: Tunngaviusumik inatsisiliornissamut ataatsimiititaliaq Inatsisartunit suliaripallanneqartoq

- Kalaallit tunngaviusumik inatsisissaannik suliaqarneq namminersulernissap tungaanut alloriarnerussaaq pingaarutilik. Taanna siunissaq eqqarsaatigalugu suliaavoq, aammalu namminersortutut naalagaaffinngornissamut aqqutissamut piareersarnerit pingaarutillit ilagaat, taanna tusagassiuutinut nalunaarummi allappoq.

Qaasuitsoq Kujallermi borgmesterinngortussaq, Ane Hansen (IA) isumalioqatigiissitami siulittaasup tullerilissavaa. Ilaasortat sinneri tassaapput, Jess Svane (S), Mimi Karlsen (IA), Per Rosing-Petersen (PN) aamma Mala Høy Kúko (A).

Demokraatinut ataatsimik inissaqartitsisoqarpoq, taakku maannamut ilaasortassamik toqqaarusussimanngillat.

- Tunngaviusumik inatsit ataatsimoorluta naleqartitatsinnik kulturitsinnillu tunngaveqassaaq. Kikkut tamarmik suliassami suleqataanissaat pisariaqartinneqarpoq, Suka K. Frederiksen oqarpoq.

Tunngaviusumik inatsisissaq pillugu isumalioqatigiissitap sulinini nammineq aaqqissussavaa, tassanilu aamma suleqatigiinnik pilersitsinissamut periarfissaqarput.

Powered by Labrador CMS