Futsali
Futsalimi GM-ertoqarnerani nunanut allanut sungiusaasoq pitsaassutsimik takorusuttoq
Angutit inersimasut futsalimi GM-ernissaat aqagu sisamanngornermi aallartissapput. Kikkullu pissartanngorsinnaaneri, nunanut allanut sungiusaasup, Tekle Ghebrelulip eqqoriarpaa
Ulluni tulliuttuni Maniitsumi futsalimik unamminerpassuit ingerlanneqassapput. Aqagumi sisamanngornermi angutit inersimasut Nunatsinni pissartanngorniutivinnerat aallartinneqassapput.
Pissartanngorniutivinnerni holdit qulit peqataassapput. Nunanut allanut sungiusaasoq, peqatigiiffimmullu B-67-imut sungiusaasuutigisup Tekle Ghebrelulip, ulluni tulliuttuni pitsaasumik arsaattoqarnissaa naatsorsuutigaa.
- Kissaatigaara inuusuttuaqqat inersimasulli pissartanngorniutivinnermi unammilluaqattaarnissaat, Tekle, Sermitsiaq.AG-mut oqarpoq.
Atuaruk: Futsalimik GM-ertoqarnerani unammeqattaartussat
Holdit piukkunnarnerit
- Unammiartortut sungiusarluarsimanissaat piareersarluarsimanissaallu takunissaat neriuutigaara. Aammalu holdit arsariaatsiminnik aqutsilluarsinnaanissaat, Tekle Ghebrelul oqarpoq.
Ukioq kingullermi pissartanngorniutivinnermi finalersimasut IT-79 Nagdlunguullu, pissartanngorniutivinnerni angusarissaaqqinnissaat ilamagaa.
- Angusarisimasatik illersortussaavaat. Unammersuarnermilu B-67 hjemmebanertullu Kagssagssuk angusarissaarsinnaanerat aamma ilimagaa. K-64 Kulusuminngaannersoq T-41-lu Aasianneersoq angusarissaassappata tupaallaatigissuara, nunanut allanut sungiusaasoq oqaluttuarpoq.
GM-imi pitsaanerit
- Unammersuarnermi kina arsarluanerpaasinnaava?
- Oqaatigiuminaappoq. Nunanut allanut unammisartuuteqarpugut maanna arsarluaqattaartunik. Frederik Funch B-67-meersoq ilimagineqarsinnaavoq. Taanna Tjekkiami Sverigemilu unammersuarnerni peqataanermini arsarluaqattaarsimavoq.
- Ari Hermann, Niklas Thorleifsen, Hans-Karl Berthelsen kiisalu Kaassannguaq Zeeb aamma avaqqunneqarsinnaanngillat. Kingulliit marluk taaneqartut piffissami kingullermi nunanut allanut unammisartunut peqataasarsimanngillat. Taamaakkaluartoq arsallaqqissuupput, taakkuli arsarluaqattaarnissaat ilimagaara, Tekle Ghebrelul oqarpoq.