Sara: Tunngaveqarluarnitsigut ajugaavugut

Inuit Ataqatigiit atorfiit pingaarutillit pillugit unnuap ingerlanerani partiinik allanik isumaqatiginninniarnerit aallartereersimasut, IA-mi siulittaasoq Sara Olsvig oqaluttuarpoq.

- Kommunini marlunni IA-p taaguunneqarnerpaaffigisaani (Kommuneqarfik Sermersooq aamma Qaasuitsoq Kujalleq, aaqq.) siammasissumik isumaqatiginninniarnissarput pilersaarutigaarput. Nalinginnaasumik partii annerpaasoq isumaqatiginninniarnernik aqutsisuusarpoq, tamannalu malinneqassasoq naatsorsuutigaarput. Qanoq ingerlajumaarnersoq pissangavugut, Sara Olvsig oqarpoq.

Itinerusumik inernaranut naliliinissamut partiimi siulittaasup qinikkat agguataarneqarnissaasa inernerat utaqqigallarpaa. Procentinik pingasunik siuariarneq nuannaarutigaa, tupaallaatiginngilaali.

- Siuariarnissarput naatsorsuutigisimavarput. Kommunalbestyrelsinut aamma nunaqarfinni aqutsisunut qinigassanngortitagut sulilluarsimaqaat. Tatiginartumik tunngavissaqartumillu qineqqusaarput.

- Appisaluusseqattaarnissarput siunertarinngilarput, kisianni sammisat pingaarutillit samminiarsaraagut, minnerunngitsumik nuna tamakkerlugu inoqarfiusuni qanimut oqartussaaqataaneq.

- Tamatuma saniatigut partiitut politikkimik sulianut najukkami aamma Naalakkersuisuni Inatsisartunilu sulianut ataqatigiittunik qinersisartunut saqqummiussisinnaasimavugut, Sara Olsvig oqarpoq.

Qinersinerit arlallit?
IA nuna tamakkerlugu politikkimi siuariartortoq qanittukkut inuit isumaannik paasiniaanerup takutippaa. Maannalu partii kommunimi qinersinermi siuariaateqarpoq.

Partiimilu siulittaasoq Inatsisartunut qinersiaartitsinissamut tunngatillugu eqqarsarnersoq, taamaalillunilu qinersisartunik iluatsitsillutik Siumut partiini siuttutut qaangerniarneqassanersoq apeqqutaavoq?

- Naagga. Inuiaqatigiinni eqqissisoqarnissaa ukkataraarput. Kommunit inissinnissaminnut piffissalerneqassapput, Avannaanilu kommunit nutaat marluk ikaarsaarfiulluarnissaat qulakkiissavarput, taamaalillutik januaarimi 2018-imi inissinniassammata.

Naalakkersuisut sulinermut tassunga soorunami peqataassasut, Sara Olsvig akivoq.

- Siumut procentinik sooq kinguariarnersoq ilimagaajuk?

- Tamanna allanut nalilertikkusunneruara, IA-mi siulittaasoq naatsumik akissuteqarpoq.