Ombudsmandi isorinnittoq:
Isertitsivimmi kisimiinneq ulorianarpoq
Naak isertitsiviit pitsanngorsarneqarsimangaluartut sulilu ajorpallaartut, Folketingip ombudsmandia tikkuaavoq
Folketingip Ombudsmandiata piffiit ilaanni isertitsivinni atungassarititaasut aalajangersimasumillu politiinik orniguteriaannarmik sulisoqannginneranut isorinnittuarsinnarpoq.
Kommunefogedip isertitsivik qimakkallarpagu, tigummigallarneqartoq ulorianartorsiortinneqartarpoq, sapaatip akunnerata siuliani ombudsmandip, Justitsministeriaqarfimmut allagaqaammini taama tikkuaavoq.
Aamma atuaruk: Folketingip ombudsmandiata Nunatsinni isertitsiviit isornartoqartikkai
- Kalaallit Nunaanni atugassarititaasut immikkut isigisariaqarput kisianni pisinnaatitaaffiit atuuttut atuutsinneqartussaapput. Tamanna pissutigalugu oqartussanut sillimaniarneq pillugu apeqquteqarsimavunga isertitsivinni qimanneqarallartarnerit eqqarsaatigequllugu, ombudsmandi Jørgen Steen Sørensen oqarpoq.
2013-mi Folketingip ombudsmaniata Kulusummi isertitsivik alakkarmagu sakkortuumik isorinnnerit tulleriinginnavissimapput.
Atugassarititaasut ajorluinnartut
Taamani isertitsivik ombudsmanimit alakkarneqarmat paasineqarpoq tigummigallarneqartut sulisunik kalerriisinnaanngitsut, nerisassaannik tunineqarsinnaanngitsut aammalu perusuersartarfiliarsinnaanngitsut politiinit najuuttoqartinnagut. Erseqqissaatigineqarporli tigummigallarneqartut tamarmik pinngitsooratik ikiaaraannanngorlugit misissorneqartartut.
Isertitsivimmulli matuersaat ataasinnaavoq taannalu politiit kisimik tigummisarivaat.
Aamma atuaruk: Hammond: Pitsanngorsaasoqassasoq naatsorsuutigaara
Pitsanngoriaateqartoqarsimasorli ombudsmandi erseqqissaavoq. Assersuutigalugu kommunefogedip isertitsivik qimakkallarsinnaavaa piffimmi aatsaat ikuallattoqarpat seqqortaartoqarpalluunniit. Aammalu kommunefogedit ilitsersuunneqarsimapput taamatut pisoqassangaluarpat nunaqarfimmi qatserutaasivimmut matuersaammik ilisisoqassasoq, kiisalu qanoq tigummigallarneqartumik misissuisoqarnissaanik ilitsersuunneqarsimallutik, ombudsmandi taama paasissutissiivoq.
"Sivikitsoq" qanoq sivisussuseqarpa?
Taamatullu pisoqariasaarsinnaaneranut isertitsivimmiitinneqarallartut kisiimitinneqarallarnissaat ernummatigineqarpoq.
- Ernummatiga tassaavoq taama pisoqariataaraluarpat kommunefogedip isertitsivik qimattariaqassammagu tigummigallarneqartorlu piffissami nakkutigineqaranilu ikiorneqarnissaminik kalerriisinnaajunnaassalluni.
Tamanna pissutigalugu ombudsmandip isertitsivimmiitinneqartut qanoq isilluni pitsanngorsaavigineqarsinnaaneri Justitsministeriaqarfik aaqqiissuteqaqquaa.
- Kommunefogedip taama pisoqartillugu isertitsivik qaqutikkuinnaq sivikitsuinnarmillu qimaqqasaraat oqartussat paasissutissiarisimavaat. Taamatullu pisoqartarnera ukiumut qanoq akilikitsigisumik pisoqassagatinneqarnersoq erseqqissaatigineqarsimanngilaq. Kiisalu ukiumut arlaleriarluni taama pisoqartarnersoq, "sivikitsorli" qanoq sivisussuseqarnersoq erseqqissarneqarsimanani.
Ombudsmandip ernummatini Justitsministeriaqarfimmiik akissuteqarfigineqarnissaat massakkut utaqqivaa.