flygtningedebat
SIumut Inusuttaasa qimaasunut tigusisalernissaq avissaartuutigaat
Siumup Inuusuttaani kattuffiup nakkutilliisuata Konrad Boyep, Steve Olsvig Sandgreenip qimaasut pillugit oqaaseqaataa uparuarpaa.
Sapaatip akunnerata siuliani Sermitsiaq.AG-ip allaaserinnippoq Siumup Inuusuttaani siulittaasup Steve Olsvig Sandgreenip Naalakkersuisuni qimaasunut tigusisalernissamik nutaamik oqallittoqarnissaa pisariaqartoq.
- Piffissanngorpoq uagut kalaallit akisussaaffimmik tiguseqataalluta qimaasunik tigusisinnaanngornissarput, Steve Olsvig Sandgreen ilaatigut taama allappoq.
Siumup Inuusuttunut Suleqatigiiffiata Nakkutilliisoqarfia siulittaasup oqaaseqarnera pillugu uparuaavoq.
Atuaruk: Siumup Inuusuttunut Suleqatigiiffiat: Qimaasunik tigusisariaqarpugut
Maleruaqqusat malinngilai
- Ilaasortatta arlallit siulittaasutta oqaaseqaatai akerlilerpaat, kattuffiup siulittaasua Konrad Boye Siumup Inuusuttaasa siulersuisuinut taama nalunaaruteqarpoq.
Taamatut oqaaseqartigani kattuffimmi ilaasortat tusarniaavigineqartassasut ilanngullugu erseqqissaatigaa.
Atuaruk: Atassutip inuusuttai qimaasunik ikiuukkusunngillat
Nakkutilliisoqarfiup suliassaasa ilagaat nakkutigissallugit siulersuisut suliaasa ataatsimeersuarnermi suliassiissutigineqartunit allaanerunnginnissaat aammalu nakkutilliisoqarfiup qulakkiigassaraa ileqqut atuuttut allassimasuunngitsut allassimasullu piviusorsiortumik ingerlanneqarnissaat.
Taamatut pisoqaqqinnginnissaa kissaatigaa
Suliaq uani pineqartoq tassaavoq kattuffiup siulittaasuata oqallissaarutaa ”qimaasunik nunarput tigusisariaqalerpoq”. Ilaatigut oqallissaarutip qaqinneqarneraniit Nakkutilliisut maluginiarsimavaat inuiaqatigiit akornanni oqallinnerujussuaq minnerunngitsumilli ilaasortat akornanni iluaaginninneq pingaartumik qulequttamut tunngatillugu ilaasortanut aammalu siulersuisunut tusarniaasoqarsimannginneranik unnertoqarluni.
- Nakkutilliisoqarfiup annertuumik uparuarpaa Siulersuisuunerit qulequttanik angisuunik qaqitsisoqassatillugu periuseqannginnerat. Tamanna sulissutigineqartariaqartoq Nakkutilliisut piumasaraat. Nakkutilliisut maluginiarpaat siulittaasoq unneqqarilluni periutsinik kukkusimanerminik allagaqarmat, tamannalu pitsaasutut isigaat. Nakkutilliisut kissaatigaat suliamik taamaattumik siunissami qaninnerusumi naapitaqaqqissanatik. Konrad Boye taama allappoq.