Tasiilaq

Tasiilami aaqqiissutissamik politikkerit piumasaqarput

Tasiilami immikkut iliuuseqarnissamik politikkerit piumasaqarput. Ukiup aallartinnerani sapaatip akunnerata ingerlanerani alianaqisumik inuit marluk imminnut toqunnerisa toqutsisoqarneratalu kingorna taama pisoqarpoq .

Tasiilami sila issikkaluaqisoq inuit 200-nik ikinnerunngitsut ikumatitalerlutik ataasinngornermi ingerlaaqatigiipput.

Sapaatip akunnerata siuliani Tasiilami innuttaasut ikumatitalerlutik ingerlaaqatigiipput.

Tamanna sapaatip akunnerani inuit marluk imminut toqunnerisa toqutsisoqarneratalu kingorna pivoq. Pineqartut arnaapput inuusuttut.

Taama ikumasartulerluni ingerlaaqatigiinnerup imminut toquttarnerup annertunerujussua akiorniarlugu siunertaasa ilagaat.

Politikkerillu kommunimut naalakkersuisunullu ataatsimoorluni annertusisamik iliuuseqartoqassasoq piumasaraat.

Atuaruk: Tasiilarmiut anorersuarmi neriuummik ikitsisut

Misissuisoqarnissaa piumasaraa

Meeraanermi misigisarlussimasut, suliffissaaleqisut inissiamillu annaasaaqarnerit imminortarnermut pissutaaqataanersut Mala Høj Kúkop (A) piumasaqarpoq .

-Isumaqarpunga piffissanngortoq Naalakkersuisut Kommuneqarfik Sermersuumik qanimut suleqateqarlutik qulaajaaqqissaartariaqartut paasiniarlugu qulaani taasakka qanoq amerlatiginersut iliuutsillu sorpiaanersut.

Nuna tamakkerlugu periusissiortoqartariaqarpoq

Tasiilami pisut aallaavigalugit toqutsisarnerup, imminut toquttarnerup nakuusertarnerullu akiorniarnissaanut nunarput tamaat isigalugu katsorsaanissamik periusissiornissaq pisariaqartoq Laura Táunâjik (S) isumaqarpoq,

Pisut ataavartuartut qaangerniassangaanni meeqqat aallaavigineqartariaqartut isumaqarpoq.

- Eqqaamallugu meerartavut amerlasuut atugarliorput, atornerlugaapput katsorsaasoqanngippallu aamma ajoraluartumik pineqartut pissutsinik ingerlatitseqqiisussaapput, taamannallu kaaviaartumik pissuseqarluta mattusersuiinnassanngikkutta pinngitsoortitsiniarnissaq annertunerusoq aallaavigalugu pilersaarusiortariaqalerpugut, tusagassiuutinut nalunaarummi Laura Táunâjik (S) taama allappoq.

Inuussutissarsiornikkut piorsaasariaqarpugut

Tunumi inuusuttunut inuussutissarsiornikkut ilinniartitaanikkullu periarfissat piorsaaqataasinnaasut tikkuunneqarput.

- Tunumi nutaanik inuussutissalerinermik suliniuteqartariaqalerpoq, tusagassiorfinnut nalunaaruteqarnermini Iddimanngiiu Bianco (IA) allappoq.

- Tunumi inuussutissarsiornikkut piorsaasariaqarpugut, aalisakkerivimmik pilersitsisariaqarpugut suliffissanik isumannaarinnittussamik. Takornariaqarnikkut piorsaasariaqarpugut illoqarfiup ineriartorluarnissaanik siunertalimmik.

Atuaruk: Kommunimi upalungaarsimasuutitat Tasiilamukartut

Mittarfik

Takornariaqarnikkut ineriartortitsinikkut periarfissat nutaat ilagaat, tassungalu atatillugu periarfissaq ataaseq Justus Hansen (D) taama aamma immikkuullarissuteqartippaa.

- Mittarfik pisariaqartipparput, taamatut oqarnera qineqqusaarutaannaanngilaq, Sermitsiaq.AG-mut oqarpoq.

Imigassamik mattussineq?

Inuiaqatigiit ajornartorsiutaannut sumiginnaanerullu imigissap peqqutaaqataanera Mala Høj Kúkop (A) eqqaavaa.

- Naalakkersuisut isumaliutigisariaqaraat minnerpaamik imigassat tuniniarneqartut piffimmik aalajangersimasumik Tasiilaq-mi nunaqarfittaanilu matoqqatinneqarnissaat iluaqutaasinnaanersoq, allakkamik ammasumi allappoq.

'Tasiilaq aanaarpoq'

Politikkerit tamarmik assigiinngitsunik suliniuteqartoqartoq nalunngilaat, pisulli kingulliit takutippaat suliniutit naammanngitsut.

- Killiffipput ilungersunarpoq, Tasiilaq aanaarpoq, meerannguit inuusuttunnguillu siunissaat nalunaaquttap akunneri tamaasa mangiarneqarput, taamaammat iluunngarlunga Naalakkersuisunut kaammattuutigivara piaarnerpaamik immikkut annertusisamik iliuuseqartoqassasoq.

Powered by Labrador CMS