Piniarneq
Tasiilap eqqaani tuttoqarneranik tusatsiakkat
Sermilimmi tusatsiakkat malillugit tuttoqarnerluni? Atassummeersup Mala Høu Kukop tamanna misissortinniarpaa
Tunumi tuttoqatigiiaaqarneranik tusatsiakkanut, Inatsiartunut ilaasortap Mala Høy Kukop, Naalakkersuisut akissuteqaqqullugit qinnuigai.
- Ujarassiortut oqaluttuartarnerat malillugu tuttutunik sermiliup qinnguata iluani takunerarsimanerartarput, Atassummi politikerip §37 naapertorlugu Naalakkersuisunut apeqqutigisaani taama allaqqavoq.
Atuaruk: Tasiilap eqqaani qilalukkat amerlassusaat misissuiffigineqartussanngorput
Taamaattumik piniagassat uumasut taakku pillugit paasissutissaqarnersoq misissuititserusuppoq. Mala Høy Kukop aamma apeqqutigaa, Tunup sineriaani tuttut amerlassusaannik ilisimasalinnik peqarnersoq.
Tunup sineriaani siornatigut tuttunik takusoqartareernikuuvoq, taamaattumillu taakkunanngaanneersinnaapput, tamanna oqaatigineqarpoq.
Ukallit Tasiilamut
Mala Høy Kukop aamma saaffiginninnermini oqallissaarinermik ammaassivoq, tamannalu siornatigut oqallisaareerpoq; Tunup sineriaanut uumasunik nuussineq.
- Tuttunik, umimmannik ukallinik tasiilap eqqaanut -- kujataaniluunnii nuussisoqarnissaanik Naalakkersuisut pilersaaruteqanngillat?, taanna aperivoq.
Ukiut pingasut matuma siorna Tasiilami tamannarpiaq pillugu innuttaasunik ataatsimiititsisoqarpoq, kommunillu aallartitaat taamanikkut inerniliipput, Tasiilap avannaa tulluartuusoq.
Kumaqarpallaartut
- Tasiilap avannaatungaani nunataq qanga tuttoqarfiusimasoq tuttunik nuutsivigineqarsinnaassasoq isumaqarfigineqarpoq, tuttunillu nuutsisoqassappat Svaldbardimit nuutsisoqassasoq Tasiilami innuttaasunit orniginartinneqarneruvoq, taakku issimut akiuussinnaanerunerarlugit aammalu kitaani tuttut kumaqarpallaarnerarlugit, taamani innuttaasut ataatsimiinnerannit imaqarniliami tamanna allaqqavoq.
Mala Høy Kukop maanna tamanna pillugu paasinarsaatitserusuppoq.
- Ammassallup kommuniunerata nalaani uumasunik nuussisoqartarnissaanik oqaluuserinnittarnerit tusarsaasarnikuupput suliallu sumut qanorlu ingerlaqqittarnerat paatsuunganartarsimavoq innuttaasuniit, taanna Naalakkersuisunut allappoq, taakku ullut qulit iluanni akineqarnissaannut periarfissinneqarput.