isumasiuineq
Namminiilivinnissamut angertut amerlanerussuteqarluartut
Naalakkersuisut namminiilivinnissamik angusaqarusunnerannut tapersersuineq annertuvoq. HS Analysep Sermitsiaq sinnerlugu isumasiuinerata tamanna takutippaa
Naalakkersuisoqatigiit namminersulivinnissaq oqaluuserisassatut pingaarnertut inissikkamikku, inuttaasut amerlasuut isumaqataasut ersarippoq.
HS Analysep Sermitsiaq sinnerlugu isumasiuinerata tamanna takutippaa.
Atuaruk: Naalakkersuisooqatigiilersut namminersulernissaq naligiinnerulernissarlu pingaartippaat
Tapersersuineq annertooq
Apeqquteqarfigineqartuni amerlanerussuteqarluartut 64 procentiusut, Kalaallit Nunaata ullut ilaanni naalagaaffittut namminiilivinnissaa pingaaruteqartorujussuartut pingaaruteqakannertutullu akissuteqarfigaat. 24 procentiinnaat pingaaruteqarpallaannginnerarpaat. 12 procentillu namminiilivinnissaq akiuminaatsippaat.
Atuaruk: Tunngaviusumik inatsisiliornissamut ataatsimiititaliaq Inatsisartunit suliaripallanneqartoq
Inuusuttut akornanni nalornineq
Inuusuttut 18-it 29-llu akornanni ukiullit kissaateqarneq taama malunnartiginngilaq, kisianni amerlanerussuteqarluartut 56 procentit namminiilivinnissamut tapersersuipput. Tamatumunnga taakku 29 procentiisa 'naluara' akissuteqaatigaat, taamatullu 15 procentiinnaat namminersulivinnissaq pingaaruteqarpallaanngitsutut oqaatigaat.
Atuaruk: Kim Kielsen tulluusimaartoq: Namminersulernissamut ingerlariarneq pingaarutilik
Atassummut tapersersuisut kisimik qulartut
Partiit akornanni agguataarnerat qiviaraanni, namminersulivinnissamut Atassummut tapersersuisut 46 procentiusut akuersaartut ikinnerussuteqarput, 50 procentillu pingaaruteqannginneraallutik akissuteqarput. Demokraatit tapersersortaannit amerlanerussuteqalaartut tapersersuipput.
Partiillu saamerliit tapersersortaat IA-p, Partii Naleqqap aamma Siumup 70 procentit missaaniittut, Kalaallit Nunaata namminiilivinnissaanut sulissuteqarnissaq pingaarutilittut oqaatigaat.
HS Analysepinnuttaasut katitigaanerannut naapertuuttumik sinniisuusut, inuit katillugit 708 apersorpai.
Misissueqqissaarneq tamaat Sermitsiami atuarsinnaavat