Folketingi

Aaja: Politiit aappaagu pitsaanerusunik radiukkut atortorissaaruteqalissapput

Folketingimi ilaasortap ilungersuussaq iluatsittoq nuannaarutigaa

Aaja Chemintz Larsen, IA
Aaja Chemnitz Larsen 2017-imut aningaasanut inatsimmut naammagisimaarinnippoq

Danskit aningaasaqarnermut ministeriata Claus Hjort Frederiksenip (V) 2017-imut aningaasanut inatsit pillugu septembarimi Folketingimi partiit tamaasa ataatsimeeqatigisaqattaarlugit aningaasanut inatsimmut isumaqatiginninniarnerit aallartippai.

Inuit Ataqatigiit kajumissaarutaat naapertorlugu, aningaasaqarnermut ministeriaqarfiup partiit Nunani Avannarlerneersut ilannguppai. Aallarniutaasumik ataatsimiinnerit nangillugit 2017-imut aningaasaqarnermut inatsit pillugu aningaasaqarnermut ministerip Claus Hjort Frederiksenip (V) aamma folketingimut ilaasortap Aaja Chemnitz Larsenip (IA) marlunngornermi oqaloqatigiinnertik nangippaat.

Atuaruk: IA qallunaat aningaasanut inatsisaannut piumasaqaatinik piariigaqartut

- Danskit naalakkersuisuisa kalaallit folketingimut ilaasortaasugut ilaatimmatigut naleqquttuuvoq. Folketingimi ilungersuutigisimasanni tulluusimaarutiginerpaasama tamanna ilagaat, siunissami issuaneqqarnissaanut pilersinneqarnera pissutigalugu. Maanna isumaqatiginninniarnernut tusarnaarneqarluta peqataavugut, aningaasaqarnermut ministerimik oqaloqateqarnerup kingorna, Aaja Chemnitz Larsen tusagassiuutinut nalunaarummi erseqqissaavoq.

Atuaruk: Attaviitsutut oqalugiaqqaarneq: Aleqa kommunefogedit amerlanerunissaannik ujartuivoq

Politiinut atortorissaarutit pitsaanerusut
Politiit radiukkut attaveqaqatigiinnermut atortorissaarutaat nutarterneqarnissaat, partiip iluatsissimagaa Inuit Ataqatigiit erseqqissarpaat, taamaalillutik politiit isumannaatsuunerat annertusineqarluni.

- Ukioq manna LIVEX-imi sungiusarnermi, radiukkut attaveqaatit nutaaliaanerusut isumannaatsumik sulinissamut allaanerutiginersut, Kalaallit Nunaanni Politiit malugaat. Ataatsimut isigalugu aningaasanut inatsimmut isumaqatiginninniarnernut peqataanerup kinguneraa, iliuusissat arlaqartut qulakkeerneqarnerat aamma iliuusissat nutaat pilersinneqarnerat, folketingimut ilaasortaq ilanngullugu oqarpoq.

Atugarliortut
Kalaallinut atugarliortunut aningaasaliisoqarnerunissaa Inuit Ataqatigiit ukioq manna ilungersuusseqataasimavoq, tamannalu sapaatip-akunnerani kingullermi isumaqatiginninniartoqarneratigut aningaasanik 46,4 millionit koruuninik immikkoortitsisoqarneranik kinguneqartitsivoq.

Piffissami aggersumi IA-p folketingimut ilaasortaatitaata Kalaallit Nunaat pillugu Danmarkimi ilisimasaqartitsinerulernissamut qulakkeerinninniarluni sulissutiginninniarpoq, Danmarkimilu kalaallit palasit amerlanerulernissaat, kiisalu kalaallinut ilinniartunut SU-siat ajorseriannginnissaat qulakkeerniarnissaat.

2017-imut aningaasanut inatsit Folketingimi novembarip 17-anni 2016-imi aappassaaneerneqarnissaa naatsorsuutigineqarpoq.

Powered by Labrador CMS