Inatsisartut

IA suleqatigiinnissamut assammik isaassivoq

Partiip aningaasaqarnermut politikkimut siammasissumik aamma ataavartumik isumaqatigiissuteqartoqarnissaa neriuutigaa

Sara Olsvig

Naalakkersuisut siulittaasuata Kim Kielsenip (S) ammaanermi oqalugiaataa Inatsisartut ataasinngormat oqaluuserimmassuk, partiip illuatungiliuttup Inuit Ataqatigiit (IA) ataatsimiinnissaq sioqqullugu oqariartuutit assigalugit suleqatigiinnissamut ammaassipput.

Atuaruk: Kielsen: Innuttaasut Nunatsinnik kivitseqataassapput

Inuiaqatigiit naatsorsuuteqarput
- Inuit Ataqatigiit ukiaq manna aningaasanut inatsimmut Inatsisartunilu oqaluuserisassanut allarpassuarnut neriuuteqarluarpugut. Inuiaqatigiit neriuuteqarfigalutalu naatsorsuuteqarfigaatigut. Ataatsimoornissamut suliniuteqarta, IA-mi siulittaasoq, Sara Olsvig, oqalugiarnermini oqarpoq.

Atuaruk: Ukiaanerani ataatsimiinnermi IA-mit siunnersuutit 28-t

Ataavartunik isumaqatigiissuteqarneq
Taassuma aamma neriuutigaa, siunissami aningaasaqarnikkut aaqqissuusseqqinnissanut oqaluuserineqartussanut Inatsisartut ataatsimoorussinissamut tapersiinissaat.

Naalakkersuisut upernaaq Attassinissamut siuariartortitsinissamullu pilersaarut saqqummiuppaat, taanna isumaginninnermut, akileraartarnermut, ineqarnermut aamma ilinniartitaanermut aaqqissuusseqqinnissanik siunnersuutinik imaqarpoq.

Aaqqissuusseqqinnissallu taakku siammasissumik, ataavartunillu isumaqatigiissuteqarnissamut piffissaq qinigaaffiusoq qaangerlugu atuuttussanik pilersitsinissamut ataatsimoorfissaavoq - taamaalillunilu aningaasaqarnikkut ungasinnerusoq eqqarsaatigalugu siunniussaq qulakkeerneqassaaq.

Atuaruk: Randip aningaasatigut ajutuunngersaaneq unitsinniaraa

Akisussaaffik annertooq
- Naalakkersuisut taamaammat akisussaafferujussuarmik tigummiaqarpusi. Illuatungissi oqaloqatiginissaannut, illuatungissi tusarnaarsinnaanissaannut, isumallu assigiinngikkaluarpata naaperiaateqarsinnaanissamut, IA-mi siulittaasoq oqarpoq, taassuma saniatigut siunnersuutigaa aaqqissuusseqqinnissamut ataatsimiititaliaagallartunik pilersitsisoqassasoq, partiinit tamanit peqataaffigineqartussamik.

Ilisimasanik katersineq
- Ataatsimiititaliaagallartup pingaarnertut suliassarissavaa aaqqissuusseqqinnissanut ilisimasatigut tunngavissat katersornissaat, tamatumani nalunaarutit isumaliutissiissutillu naammattut pigereerpavut, tigussaasumik ilisimasat taakkunannga suut maannakkut atorneqarsinnaanersut katersussallugit, politikkikkullu eqqartueqatigiinneq aallartissalugu akileraartarnikkut, ineqarnermut isumaginninnikkullu aaqqissuusseqqinnerit qanorpiaq iluseqarnissaannik piareersaassallutik Inatsisartunullu siunnersuusiussallutik, Sara Olsvig oqarpoq.

Powered by Labrador CMS