angalaneq
Sullualukkut angalaneq iluatsittoq
Umiarsuit takornariartaatini angisuut akornanni Sullualukkut angalasut siullersaat, Crystal Serenity, tallimanngormat iluatsittumik Amerikap imartaata avannaatigut angalareerluni New Yorkimut tikippoq
Amerikamiut umiarsuaq takornariartaataat Crystal Serenity iluatsittumik Amerikap avannaatigut angalareerluni New Yorkimut tikippoq.
Angalanermut 7,297 sømilimik isorartussusilimmut ulluni 32-ini angalanerani ilaasut 1.000-it sinneqartut inuttallu 600-ut ilaapput, maritimedanmark.dk allappoq.
Iluatsilluartoq
Tuluit umiarsuaata ilisimasassarsiuutip RRS Ernest Shackletonip umiarsuaq takornariartaassuaq avannarpasinnerpaakkut angalanerani ingerlaqatigaa. Aqqutaanilu ajornartoortoqarsimanngilaq.
Crystal Cruisesip angalaneq iluatsilluartorujussuunerarpaa, aqqullu 2017-imi angallavigeqqinniarlugu.
Taanna takornariartaat Issittup imartaani sikoqaqisumi Sullualukkut angalasut kisiartarinngilaat. Aggustip 16-ani Tyskit umiarsuaat takornariartaat Hanseatic inunnik 170-inik ilaasoqarsinnaasoq Norgemit Tromsømit Alaskamut ingerlaarpoq.
Atuaruk: Nordvestpassageakkut umiarsuarmik angalaarneq siulleq