rapmusik

Rappertartoq siullermeerluni albummiliortoq

Inuusuttoq rappertartoq Josef Tarrak Petrussen maanna siullermeerluni albummiliani piareerpaa

17-årige Josef Tarrak Petrussen er klar med albummet 'FxGxS'

17-inik ukiullip Josef Tarrak Petrussenip musikvideo erinarsuut 'Tupilak' atorlugu qanittukkut saqqummersippaa, taanna Nunatsinni aalassatsitsivoq.

Taassuma kalaallit qallunaanit immikkoortinneqartarnerat pillugu rapperpoq, kisianni taallanik sakkortuunik erseqqissarpaa, illuatungeriinnit akisussaaffigineqartoq.

Musikvideo kingorna amerlasuunit ingerlateqqinneqaqattaarpoq. Alaskami, Northern Territoriesimi, Nunavumi, Nunavimmi, USA-mi, Savalimmiuni, Islandimi, Danmarkimi, Sverigemi, Polenimi aamma Australiami aamma ingerlatinneqarpoq.

Musikvideo taanna nuannarineqarluartoq maanna 67.000-t sinnerlugit takuneqareerpoq, 1600-nillu ingerlateqqinneqarsimalluni.

Atuaruk: Musik video ingerlatinneqaqattaartoq: Josefip Qallunaat Nunaat kamaatigaa

Albummi siulleq
Josef Tarrak Petrussen maanna albummiliani siulleq piareerpaa, taanna taaguuteqarpoq FxGxS.

Tamanna saqqummersitsisarfik Mediahouse Qunnersuaq suleqatigalugu saqqummersinneqarpoq.

Albummimi aamma uku nipilersoqataapput: plusq, Malik, Peand-eL, Taatsi aamma Nick Ørbæk Jacobsen Isumameersoq. Taallat Josef Tarrak Petrussenimit allanneqarput, nipilersuusiortut Uyarakq, Peand-eL aamma plusq akulinnikuunngillat.

Norgemiittoq
Albummi nipilersukkanik nioqquteqartarfinni assigiinngitsuni pisiarineqarsinnaallunilu tusarnaarneqarsinnaasoq ilisimatitsissutigineqarpoq, ilaatigut iTunesimi.

Josef Tarrak Petrussen maanna Norgep illoqarfiisa pingaarnersaannut Oslomukarpoq, poetry slamimut peqataasjartorluni aamma tusarnaartitsiartorluni. Angalaneq taanna NUiF-mit aaqqissuunneqarpoq.

Josef Tarrak Petrussenip atugaa 'Tupilak' uani takuuk:

Powered by Labrador CMS