assammik arsarneq
Apersuineq: Unammisartut semifinalimut anngutinngitsoornertik ugguaraat
Amerikap nunavittaani pissartanngorniunnermi semifinalimut anngutinngitsooraluarlutik, unammisartut unamminerni kingullerni tamaviaarnissaminnut piareerput
Kalaallit Nunaat maanna assammik arsarluni nunarsuarmi pissartanngorniunnissamut peqataanissamut periarfissaarutereerpoq.
Tassami nunarsuarmi qeqertat annersaat, Amerikap nunavittaani pissartanngorniunnermi puljemini pingajuattut inissippoq.
Pissartanngorniunnermi ajugaasut tallimaattut annerpaamik inississinnaaneranik tamanna isumaqarpoq. Iligiikkaat pingasut pitsaanerpaasut VM-imut anngutissapput, taanna Frankrigimi januaarimi pissaaq.
Atuaruk: Kalaallit Nunaat semifinalimut anngutinngitsuulaartoq
Misigissuseq imaqanngitsoq
Kalaallit unammisartut tupinnanngitsumik pakatseqqapput, ingammik semifinalimut anngunnissaminnut sekundialuinnaat aalajangiisuummata.
- Imaqanngitsutut misigisimavunga. Semifinalimut anngutingajalluinnarpugut. Målip ataasiinnaap ingerlaqqinngitsoortikkaatigut takullugu nuanninngilluinnarpoq, nunanut allanut unammisartoq Akutaaneq Kreutzmann oqarpoq.
Argentinap målimik ataatsimik Chilemut sismanngormat ajugaanera, Kalaallit Nunaata semifinalimut anngutinngitsuulaarneranut aamma VM-imut anngussinnaaneranut toqqaannartumik pinngitsoortitsisuuvoq.
Naggataa tikillugu sukataarniartut
Akutaaneq Kreutzmannilli oqaatigaa, iligiit pissartanngorniunnerup naggataa tikillugu sukataassasut.
- Pissartanngorniunneq tamaat unammeriaaserisarput naatsorsuutigineqarsinnaavoq. Ajunngitsumik naammasserusuppugut, unamminissallu sinneri ajugaaffigalugit, Akutaaneq Kreutzmann oqarpoq.
Kalaallit Nunaat arfininngorpat USA-mut unammissaaq.
Video nuannerluinnartoq takuuk: Unammisartut ajugaanertik imatut malunnartittarpaat