Aalisarsinnaanermut akuersissutinik itigartitsinerit kamatsitsisut

Namminersorlutik Oqartussani Aalisarnermut, Piniarnermut Nunalerinermullu Naalakkersuisoqarfik tapertaralugu piniarnermik inuussutissarsiuteqartunut maannakkumut qaleralinniarnissamut akuersissutinik amerlasuunik tunniussaqareerpoq.

Ukioq manna aallarnerfigalugu tapertaralugu aalisarnermik inuussutissarsiutillit aqutsiveqarfinni Qeqertarsuup Tunuani, Uummannani aamma Upernavimmi katillugit 300 tonsinik qaleralittassinneqarput, nunallu sinnerani 1.000 tonsinik qaleralittassinneqarlutik.

Inuussutissarsiortut naammagittaalliortut
Taamatulli Naalakkersuisut aalajangernerat aalisarnermik piniarnermillu inuussutissarsiuteqartunit amerlasuunit, ukiut kingulliit ingerlaneranni qaleralinniarsinnaanermut akuersissutinik qinnuteqartaraluarlutik itigartinneqartartunit, akuersaaruminaatsinneqarpoq. Taakkumi qalerallit aningaasatigut isertitsissutaanerusaraluartut, aalisarsinnaanngilaat.

Johan Lindenhann Qeqertarsuarmeersoq, ukiut 50-it missaanni aalisarnermik piniarnermillu inuussutissarsiuteqartoq, maannakkullu utoqqalinersiuteqartoq, Aalisarnermut Piniarnermut Nunalerinermullu Naalakkersuisoqarfimmut qaleralinniarsinnaanermut akuersissummik ukiut kingulliit ingerlaneranni qinnuteqartaraluarpoq.

Atuaruk: Bundgarnersorneq ukioq manna aallartiaarpoq

Kingullermik januaarimi aamma februaarimi qinnuteqarpoq. Qinnuteqaataali tamarluinnarmik itigartinneqartarput.

Johan Lindenhann 11.400 koruuninik qaammammusisarpoq, akileraarutillu peereerlugit 7.300 koruunit tigusarlugit.

Utoqqalinersianik ilanngaavigineqartoq
Siornali saarullinnik aamma nipisat suaannik tunisinermigut 133.000 koruunit missaat aalisarluni isertippai. Tamatumalu kingunerisaanik utoqqalinersiutai ilanngarneqarput.

Maannakkullu qaammammut 4.300 koruunit tigusarpai. Akiligassallu tamaasa akilereeraangamigit, 500 koruunit missaanniittut taamaallaat sinnerisarpai. Taamaattumillu aningaasaqarnera ilungersunartorujussuanngorsimavoq.

Atuaruk: Naalakkersuisumit nersualaarneqarluartoq

Aalisarnermik inuussutissarsiorniarluni akuersissummik qinnuteqartaraluarnini itigartinneqartuarmata, paasisinnaanngilluinnarpaa.

Saarullinnik tunisisinnaavoq, qalerallilli tuninerini akigissaarnerummata, aningaasanillu isertitsissutaalluarsinnaallutik, taakku aalisarnissaat orniginartinnerugaluarpai.

- Utoqqalinersiutikka inuussutigisinnaanngilluinnarpakka, taamaakkaluartoq Namminersorlutik Oqartussat aningaasarsiornissannut killilersorpaannga, tamannalu akuersaarneqarsinnaanngilluinnarpoq, Johan Lindenhann oqarpoq.

Tapertaralugu piniartartut qaleralinniarsinnaatitaasut, namminerlu inuussutissarsiutigalugu aalisarnermik allagartaqaraluarluni qaleralinniarsinnaatitaannginni paasisinnaanngilluinnarpaa.

Aammattaaq Henning Dalager, Qeqertarsuaq, Qeqertarsuup eqqaani qaleraleqarfinni aalisarsinnaanngilaq. Taanna, allarpassuit assigalugit, qaleralinniarnissamut akuersissummik ukiut kingulliit ingerlaneranni qinnuteqartaraluarpoq, itigartinneqartuarlunili.

Atuaruk: Halibut Greenland ukioq manna avaleraasartoorniassanngilaq

- Qinnuteqaatikka itigartinnneqartuaannarput, tamannalu assut pakatsinarpoq. Qaleralinnarneq aningaasarsiorfiulluarsinnaasoq nalunngilarput, maanili aalisartut amerlanngitsuinnaat qaleralinniarnissamut akuersissutaateqartut, uagutsinnut naleqqiullugit aningaasarsiornissaminnut periarfissarissaarnerupput. Aningaasatigut ilungersunartumik inissisimagaluarluta, annerusumik iliuuseqarsinnaaneq ajorpugut, taanna oqarpoq.

Aalisartut Piniartullu Peqatigiiffianni Qeqertarsuarmi, APPQ-mi ilaasortanit 50-t missaanniittunit, 15-it missaanniittut kisimik qaleralinniarnissamut akersissummik peqartut, peqatigiiffiup siulittaasua Kalé Mølgaard oqarpoq.

Atuaruk: Attumit Kitsissuarsunnut nipisanniarneq aallartissaaq

Qaleralinniarnissamut akuersissutit pissarsiariniarnerisa ajornarnerujussuat sumik pissuteqarnersoq paasiniarlugu APPQ-mi siulersuisut Namminersorlutik Oqartussanut arlaleriarlutik saaffiginnissuteqartaraluarput, kinguneqarneq ajortumik.

Aaqqiisoqassasoq neriorsiusoq
Inatsisartunut ilaasortaq, Nikolaj Jerimiassen, Siumut, aamma Aalisarnermut Piniarnermut Nunalerinermullu Ataatsimiititaliamut siulittaasuuvoq. Namminersorlutik Oqartussat sinerissap qanittuani qaleralinniarneq pillugu nalunaarutaat, aalisartukillisaanissamik siunertaqarsimagaluartoq, maannakkut allanngortinneqassasoq taanna ilisimatitsivoq.

Nalunaarutip taamatut imaqarsimanerata kingunerisaanik qaleralinniarnissamut qinnuteqartartut amerlasuut itigartinneqartarsimasut taassuma oqaatigaa.

Umiatsiaaraarsortulli pakatsisinneqartarsimasut, neriuutissaqarput – tassami nalunaarummi piumasaqaataasut allannguutissaat maannakkut suliarneqareersimalerpoq.

Atuaruk: Aalisarnermut inatsit isertuunneqartoq

Taannalu Naalakkersuisunut akuerisassanngorlugu piffissami qanittumi ingerlateqqinneqassaaq. Tamannalu pereerpat, qinnuteqartut amerlanerusut akuersissummik tunineqarnissaat naatsosuutigineqartariaqartoq, Nikolaj Jerimiassen oqarpoq.

Taassuma Aalisarnermut Piniarnermut Nunalerinermullu Ataatsimiititaliaq sinnerlugu, oqaaseqarnani, Inatsisartunullu ilaasortatut oqaaseqarluni, erseqqissaassutigaa.

Una allaaserisaq aviisip akeqanngitsup, Tamanut Avannaani, saqqummertup kingulliup saqqaaniittuuvoq, taanna aviisi sapaatip-akunnerani kingullermi matuneqarpoq

Atuaruk: Nutaarsiassaqartitsiviup provinsimi aviisimi aappaa unitsippaa