peqataasussarpassuit
Pingasunngorpat Sisimiuni ajunaarnersuarmut sungiusarnissarsuaq
Sisimiuni Kalaallit Nunaanni Teknikkimik Ilinniarfimmeersut 100-t angullugit amerlassusillit peqataassapput oqartussaasut ajutoornermi upalungaarsimanermut sungiusartitsilerpata
Pingasunngorpat ualikkut Sisimiuni siggartarnerpassuarnik tusaaguit ernumassutissaqarunanngilaq.
Ulloq taanna Qeqqani Politiit Qeqqani upalungaarsimasut Sisimiunilu napparsimmavik peqatigalugit ajunaarnersuarmut sungiusassapput.
Inuusuttut 100-t peqataassapput
Sungiusarneq pissaaq pingasunngorpat nalunaaqutaq 15-17 missaani.
Sungiusarnermi Teknikkimik Ilinniarfimmi (KTI) ilinniartut 100-t sinnillit peqataassapput (sungiusarnermi inuttat).
Sungiusarneq ingerlanneqassaaq mittarfimmi KTI-milu, sungiusarnermullu ilaassaaq ikuallatsitsisuusaarneq.
Piginnaasat aserfallatsaalillugit
– PIngaaruteqarpoq oqartussaasutut ajornartoornermu upalungaarsimanermi piginnaasatsinnik misilittakkatsinnillu attassiinnarnissarput, taamaasilluni annertuumik ajutoortoqarnerani ajunaarnersuaqarneraniluunniit suliassavut isumagisinnaassallutigit. Taamaattumik taamatut ittunik sungiusartarpugut, Qeqqata politiivini pisortaq Johan Davidsen oqarpoq.
– Sungiusarnermi sammissavagut kalerrisaarinermut pilersaarutivut, suliniutit qanoq ataqatigiissarnissaat aammalu qanoq sukkatiginersugut.
Nipiliorneq biilerpassuillu
Politiit naatsorsuutigaat sungiusarnermi sungiusarfiit napparsimmaviullu akornanni ikiuinermi biilerpassuit siggartartut uteqattaassasut.
2011-mi Nuummi ajunaarnersuarmut sungiusartoqarpoq, tamatumanilu sinersortaammit Sarfaq Ittummit annaassiniarneq sungiusarnermi ilaavoq.