’Kunngiitsuuffik’, taama ateqarpoq kalaallisut rap-pivimmik immiussaq siulleq ukiut arfinillit ingerlaneranni.
Saqqummersitsisut tassaapput Yuarakq (Aqqalu Engel) aamma Peand-El (Peter Lyberth). Cd taallamigut aamma nipilersorneqarnermigut arlalitsigut nutaaliorfiulluni pissanganartuuvoq. Erinnat nipilersornerillu hip hop, rap nassaareqqillugulusooq suliarineqarsimapput, Uyarakq-qap innaallagissamik tillerpalutsitsinerinik akoorneqarluarsimallutik, rappillaqqissumik taalliullaqqissumillu Peand-el-mik peqateqarluni pilersitanik.
Taallartai erinnallu inunnut ajuallajasunut qajannartunullu tusarnaagassiaanngillat, nalitsinni kalaallip inuuneranik peqqarniitsumik oqaluttuartuugamik. Erinnami aallarniutaasumi ’inuiaat’-ni, tamanna tusaaneqarsinnaalereerpoq, , tassani tusartinneqarmat innuttaasut Naalakkersuisunut akerliussutsimik takutitsinersuat, 2014-mi Inatsisartut ammarneqarmata pisoq, Aleqa Hammondillu siulittaasutut uppisitaaneranik kinguneqartoq. Malitsiinnaarlugu tulliuvoq erinaq ateqartoq ’kunngiitsuuffik’, nunatsinni pissutsinut sakkortuumik avoqqaarliisoq.
’Kunngitsuuffiup ittorsuisa, partiit pingajoqqat siuttuisa, matut igalaallu matoorarpaat, innuttaasut tusaaneqaqqullutik matukkut kasuttormata. Innutaasut aningaasat ilungersorlutik katersaat Ittorsuit kaasarfimminnut magussorpaat, kammalaatitsillu atorfikkaanngortitserlugit. Kunngiitsuuffik soorluli umiarluk sarfarsiataartoq nunap tungaanut, kamalaatinut toqqakkanuinnaq inissaqartitsisoq. Kunngiitsuuffik inuinnarnut matoqqavoq. Nunap ajornartorsiutaasa annersaraat ’kalaaleq’ - tusaaviga - kalaaleq tassa nunap ajornartorsiutaata annerpaartaa. Eqqortoq tusarakku mamiattappit? Ilumoortoq oqaluuserissallugu ulorianarpallaarpa? Ikkattuinnaat oqaluuserisarpasi. Sikorngerlutit siutitit milillugit nipaqarnallu inuiaat kamannerat qaangiussiissuijuk, neriullutit immineerluni qaangiukkumaartoq? ’(Uanga eqikkarlugu naalisagara).
Naalisakkakka erinarsuutip ’Kunngitsuuffiup’ taallaaneersuupput, politikkikkut pissutsinut sakkortuumik isornartorsiutaasut. Erinarsuullu taanna kisimiinngilaq, allanili assigusunik taallalinnik malitseqarluni, ass. ’akornassinniippunga’ aamma ’ nunaqqatit’. Inuusuttut sakkortuumik seksualitiiteqarlutik atoqatigiittarnerat erinnani arlalinnissaaq oqaluttuarineqarpoq. Taakku ilagaat ’ piiginnakkit’.
’Løvetut angutivissatut inuususseruttortutut neqimik ooqanngitsutsugassarsiortutut arnarniarlunga anivunga unnuup taarnerani diskotekemukarlunga. Qitittarfimmi nuluminnik aalatitsillutik illigeqqusaarnerpaaq pinnernerpaarlu toqqassavara, oqqap iluani chokulaatut aattartumik. Iluatsinngippat pinniitsumik toqqaajumaarpunga. Løvip piniakkani pisaraa. Angerlamut efterfest. Kutsanneq sakkortooq, saavatigut tunuatigullu, putut tamaasa atorlugit. Angutip anisuua arnap iijorarpaa. Suli suli kujakkusuppugut, aallaqqaataarniit aallarteqqilluta’ (Uanga taallamik eqikkaanera).
Saqqarmiut tunuani pisut ajortut erinarsuutini allani eqqartorneqarput, aqangutaaruloornerit pisimasullu eqqaajartulerlugit erloqerujunnerit, aqagukkut ullaakkut iterluni pinniilleruttornerup nalaani. Ningarnerit, kamaannerit, avissaartuutsitsinerit unataanerit. Inuusuttut sakkortuumik inuuneqarnerannik oqaluttuat arlalissuupput, mumisitserusunnerit, politikkimik isornartorsiuinerit, atugarliortut annakkusullutik ilungersorneri, allarpassuillu ileqqutoqqanut akerliunermik nipeqartut. Taallat sakkortuut killissamik qaangiisut tupannartut. Naalaartullu nammineq aalajangissavaa mamiatsarusunnerluni, imaluunniit isumaqassanerluni nunatsinni inunnut imminnuinnaq eqqarsaatigalutik atugarissaarlutik iluarisimaarluartunut avoqqaarliutitut aalassatitsisutut paasineqassanersut.
Uanga nuannaaraara nipilersortartut pisinnaasaqarluartut ineriartornerannik, Uyarakp-p aamma Peand-el-ip malinnaaffiginerat. Taakku tamarmik Koda-mit isumalluarnartutut nersornaasigaapput, Peand-el 05-imi. Uyarakq-lu 14-mut nersornaasigaalluni, eqqarsarlugalugu tapersersuisarnerit arlaatigut iluaqutaasartut. CD-mi rapperit allat peqataasut tassa White Nich-R, Da Bartili Crew, Kuno Hammond ( Thornstones) aamma Malik Kleist (Chily Friday).
CD Uyarakq-ip nammineq saqqummersitsisarfittaavanit Mediahouse ’Qunnersuaq’-mit saqqummersinneqarpoq. Taaneqareersutut erinnat hip hop, rap 2015-meersuupput, erinnallu ilamerni (samples) erinarsuutinit ilisarisimaneqareersunit ilaqalaarlutik, R.Lyberth-ip ’imigassaq’, Sume-kutoortoq, aamma O Kristensen-ip erinarsuusiaanit ’Zoo inuillu. Saqqaanik titartaasuuvoq Maja-Lisa Kehlet Hansen. Erinarsuutinik tussiutinillu juullerpaluttunik qatsusisimasut tuaviorlutik ’Kunngiitsuuffik’ pisiariartorsinnaavaat, ukiortaami tunissutissaqqilluarmat, inuusuttut mumisitserusulluartut 2015-meersut nipaat ilumoortoq. Sermitsianit 6-nit 5-it Kunngitsuuffimmut tunniutissapput.