Upernavik

Kiatsikkiartornera aalisartunut pitsaasuuvoq

Upernavimmi eqqaanilu nunaqarfinni marlunni ukioq manna ukiuunera allaalluinnarluni sikugaluariarluni imarornerata nassatarisaanik taavani aalisarneq ingerlalluarpoq

Upernavimmi ukiuuallaarsimanngilaq. Tamannalu aalisarnermik ingerlalluartitsivoq

Silap pissusiata allanngoriartornera Upernavimmi eqqaanilu nunaqarfinnut malunniuppoq.

Upernavimmi eqqaanilu nunaqarfinni Aappilattumi aamma Upernavik Kujallermi ukioq manna ukiuunera allaalluinnarluni sikugaluariarluni imarornerata nassatarisaanik taavani aalisarneq ingerlalluarpoq, royalgreenland.gl ilisimatitsivoq.

Upernavimmi nunaqarfinnilu Aappilattumi Upernavimmilu Kujallermi ukiut siuliinut naleqqiullugu annertunerujussuarmik tunisipput, suliffeqarfik ilisimatitsivoq.

Ukiuunera allaalluinnartoq
- Upernavimmi nunaqarfinnilu Aappilattumi Upernavimmilu Kujallermi nalinginnaanngitsumik imaroqqanera pissutigalugu ingammik Upernavimmi aalisariutit sisamat ukiut siuliinut naleqqiullugu annertunerujussuarmik tunisipput. Quersuarni qerititsiviutigisuni uningasuutigineqartut annertuut Royal Arctic Linep assartuutaata Pajuttaatip qanittukkut assartormagit sumiiffinni pineqartuni ukioq manna inissaqartitsiunnaarneq pissutigalugu tunisineq unitsinneqassanngilaq, Upernavimmi pigisaanilu Royal Greenlandip tunisassiorfiini tunisassiornermi ingerlatsisoq Harald Kleemann, Royal Greenland.gl-mut taama oqarpoq.

Atuaruk: Avannaani nunaqarfik qaleralinnik aatsaat taamak tunisassiaqartigaaq

Immikkoorutilik
Taassuma ilanngullugu oqaatigaa, aalisartut aalisariutinik aalisartut aammalu umiatsiaararsortut ukiup taamaalinerani aalisarsinnaanerat immikkooruteqartoq aamma aatsaat taama pisoqartoq.

Aalisariutit sisamat umiatsiaarsorlutillu aalisartut 15-it missingi februarimiit marsip 23-iat tikillugu qalarallit 180 tonsit misinginik annertussuseqartut Upernavimmi Royal Greenlandip tunisassiorfianuit tunivaat.

- Ukiut siuliini sikumi aalisartarnermut naleqqiullugu ukioq manna pisarineqartut annertunerullutillu sukkanerujussarmik aalisarneqarput, ingammik aalisariutit qassusersorlutik aalisartut eqqarsaatigalugit, Harald Kleemann oqaluttuarpoq, Harald Kleemann ilanngullugu oqarpoq.

Marsimi matoqqasoq
Quersuarmi qeritsitsviutigisumi inissaqartitsiunnaarneq pissutigalugu marsip 23-iani Upernavimmi tunisineq unikkaluarpoq, kisiannili Pajuttaat apriilip aappaani aammalu arfineq pingajuani tulammat qalerallit 180 tonsit missingi assartorneqarmata tunisineq ammaqqippoq.

- Upernavik Kujallermi tunisineq marsip 20-iani matugaluarpoq, kisianni 45 tonsit missingi apriilip arfineq pingajuani assartorneqarmata tunisineq apriilip 13-iani ammaqqissaaq, Harald Kleemann oqarpoq.

Sikoqanngitsoq
Quersuarni inissaarunneq pissutigalugu Aappilattuni marsip ingerlanerani aasakkut sikuernissaa tikillugu tunisassiorfimmut tunisissinnaanerup unitsinneqartarnera nalinginnaavoq, ukioq mannali umiatsiaararsorlutik aalisartut 30-it missingi tunisisinnaanerat unissanngilaq.

- Ukioq manna Aappilattuni quersuup ulikkaannginnera annerusumik silamik pissuteqarpoq. Aappilattuni tunisassiorfimmut tunisineq ukioq manna unitsinneqarnavianngilaq ungasinngitsukkut quersuarmi uningasuutit assartorneqarmata, Harald Kleemann oqarpoq.

Atuaruk: Qaleralinniarneq 2015-imi iluatsinngitsoortoq

Powered by Labrador CMS