aatsitassat
Kuannersuit innuttaasunit taasissutigitinneqarnissaanit eqqissisinneqartoq
Politikkeri Atassummeersoq Steen Lynge urani pillugu innuttaasut taasitinneqarnissaat pillugu siunnerssummik saqqummiussimmat aalassattoqarpoq. Siunnersuullu Narsap eqqaani aatsitassarssiorfimmut attuumassutaarullugu suliaavoq
Kalaallit nunaani urani pillugu suliniutituaq – Narsap eqqaani Kuannersuarni qalluiffissaq – innuttaasut taasitinneqarnissaat pillugu siunnersuummit oqallisaaqisumit, Atassummeersup Steen Lyngep saqqummiussaanit unitsinneqarsinnaassanngilaq.
Tamanna aamma Inatsisartuni amerlanerussuteqartut innuttaasut taasitinneqarnissaannik aalajangissagaluarpataluunniit pisssanngilaq.
Qummut killissaq
- Innuttaasut taasitinneqarnisssat pillugu siunnersuutinni Kuannersuarni suliniutip ilaatinneqannginnera eqqortuuvoq, Steen Lynge AG-mit toqqaannartumik aperineqarnermini nassuerpoq.
Mannalu nassuiaatissaavoq: Lyngep innuttaasut taasitinneqarnissaannik siunnersuutaani, innuttaasut aatsitassani Kalaallit Nunaanni qallorneqartuni qanoq uranitaqartiginissaat pillugu qummut killiliinissamut isummertinniarneqarput. Taassumalu 0,05 procentip qummut killigitinneqarnissaa siunnersuutigaa.
Atuaruk: Taamaattumik Sermitsiaq uranimik ilisimasalinnik paneliliorpoq
Kuannersuarnili aatsitassatut qallorneqartut taamak uranitaqartiginngillat.
Australiamiut suliffeqarfissuat Greenland Minerals & Energy (GME), aatsitassarsiorfiliorniartoq, naapertorlugu akoqassutsit 0,02-p 0,04-llu akornanniipput.
GEUS-ilu (De Nationale Geologiske Undersøgelser for Danmark og Grønland) naapertorlugu, aatsitassami tonsimi qallorneqartumi urani 300 gramit missaani oqimaassusilik qallorneqartarpoq, tassa 0,03 procenti.
Allatut oqaatigalugu: 0,05 procentimik killiliineq Narsami aatsitassarsiorfimmut akornusiissanngilaq.
Assit: Nuummi uranimut akerliussutsimik takutitsinersuaq
Nunani allani killigititaq
AG-llu innuttaasut nunatsinni uranimut suliniutituamut kalluaasussaanngitsumik taasitinneqarnissamut peqataatinneqarnissaat sianiilliornerunnginnersoq Steen Lyngemut apeqqutigaa.
- Oqaaseq sianiilliorneq atussagukku, taava qummut killiliinnginnissaq sianiilliornerussaaq. Aatsaallu qalluineq aallartereerpat 0,05 procent sinnerlugu qallukkat uranitaqartut paasiniarsisinnaavoq, tanna akivoq imalu nangilluni:
- Siunnersuutiga aatsitassarsiornermik suliniummut aalajangersimasumut sammitinngilara, qaffasinnerpaaffiliilunilu killiliinissamik kissaateqarnermik ersersitsineruvoq; killiliussaq assersuutigalugu USA-mi Australiami atorneqartumut naapertuuttoq.
Atuaruk: Steen Lynge uran pillugu apeqqummi kisimiilluni suliniuteqalersoq
Allaaserisaq AG-mi uani sapaatip-akunnerani saqqummertumi atuaruk, taanna aallarnisaaneq pillugu sammisamik angisuumik imaqarpoq. Aviisi uani aamma pisiarisinnaavat: