Kommune Kujalleq

Kommune Kujalleq ilimagisamit sinneqartooruteqarneruvoq

Kommunalbestyrelsip missingersuutigisimavaa 2015-imi sinneqartoorutit 10 millioner koruuniussasut, amerlanerungaatsiarpulli

Kommune Kujalliup aningaasaqarnera pitsanngoriarpoq. Assimi Qaqortup ilisarnaataa tissaluttuliaq

Sinneqartoorutit 30,2 millioner koruunit missaat.

Kommune Kujalleq 2015-imi taamatut angusaqarpoq.

Taamaasilluni sinneqartoorutit missingersuutigisamit 20,2 millioner koruuninik amerlanerupput.

Sakkortusisamik nakkutigineqarneq

Naatsorsuutit kommunalbestyrelsip ukioq manna ataatsimiinnerani siullermi oqaluuserineqarput, ataatsimiinnerlu pivoq marsip 16-ianni Narsami.

Kommue Kujalliup atukkamigut pitsanngoriaataanut takussutissaavoq kommunip Namminersorlutik Oqartussanit sakkortusisamik nakkutigineqarunnaarsimanera.

2014-imiilli

Kommune Kujalleq 2014-imiit 2016-imi januaarip tungaanut aningaasaqarnermut naalakkersuisoqarfimmit sakkortusisamik nakkutigineqarsimavoq. Tamatumunnga pissutaavoq aningaasaqarniarnikkut ingerlanerlunneq akiliisinnaassuseqarpiarani, aammalu landskarsimit taarsigassarsiat akilersornissaannik isumaqatigiissummik malinninnginneq.

Ingerlanneqarsinnaasut ingerlanneqartussallu

Aningaasaqarnerlunneq ilorraap tungaanut saatinniarlugu Kommune Kujalliup suliassat tamaasa suliassatut ingerlanneqarsinnaasutut ingerlanneqartussatullu agguataarsimavai. Taamaasilluni missingersuutit isumaqatigiinniutigineqarnerat ajornannginnerulersimavoq, kommunillu ilaatigut qullersanut aningaasartuutit annikillisissimavai. Tamatuma saniatigut Kommune Kujalliup ikiuutigisimavai naligiissaarinikkut isertitat amerlanerusut aammalu avataani saarullittat tulaanneqarnissaannik pisussaaffeqartitsineq, kommuni paasissutissiivoq.

Powered by Labrador CMS