nerisaqarneq
Sunik nerisaqarnerput frimærkini
Nunatsinni sunik nerisaqarnerput immikkuullarissoq qitiutillugu, Tele-Postip frimærkit nutaat marluk ullumikkut saqqummiuppai
Nunani Avannarlerni ukioq allortarlugu frimærkinik nangeqattaartunik ataatsimoorussilluni saqqummiussisoqartarpoq, ukiorlu manna qulequtarineqarpoq 'Sunik nerisaqarneq'. Tele-Postip nangeqattaartunut frimærkiliaasa marluusut immikkoorlutik takutippaat Kalaallit Nunaanni nerisassiornerup iluani mamarineqarluartut: Ammassaat mattallu.
Tallimassaat
Bolatta Silis-Høegh frimærkinut marlunnut taakkununnga assilialiortuuvoq. Eqqumiitsuliortoq inuusuttoq tamatigoortorlu taanna Kalaallit Nunaata frimærkiliaanut tallimassaa assilialiortuuvoq.
Tamussiuteriaannaat
- Ammassaat mattallu Kalaallit Nunaanni sunik nerisaqarnitsinnik eqqaasama siullersaraat. Uumasuarannguaq uumasupiluunersuarlu. Issittumi uumaannarnissamut marluullutik pingaaruteqarsimaqaat. Allakkap puussaani mattak ammassalluunniit angissusivimminik angissusilik eqqarsaatinni nuannaraara … tamussiuteriaannaaviit, Bolatta Silis-Høegh oqarpoq.
Assit takukkit: Eqqumiitsuliat nikallornartut Kulturip Illorsuani Taseralimmi saqqummersinneqarput