Meeqqat illersuisuata Aviâja Egede Lyngep kommunini meeqqat atugarliortut pillugit suliat ukiaanerani oqallisaangaatsiartippai.

Oqallinnermullu isumaginninnermut siunnersortit maanna ilanngupput. Taakkua nuna tamakkerlugu kattuffiata NIISIP, ilaasortami artukkigaasarnerat pissutit ilaattut tikkuarpaa.

Siulittaasut isornartorsiuisut
- Tassani malunnarnerusoq tassaavoq inunnik isumaginninnermi siunnersortit amerlavallaarujussuarnik suliassaqartitaasartut, akulikitsunik misigisarlutik kisimiillutik sulillutik, annikilliorlutik misigisimallutik pakatsisimasarlutillu. Taakkulu NIISIP-imi ajornartorsiutit qulaani taagorneqartut ilisimaarivagut ilisimannittuullunilu suliassani arlalinni inatsisinik unioqqutitsisoqartarsimasoq, kattuffimmi siulittaasoq aamma siulittaasup tullia, Sara Abelsen aamma Karen Jensen allapput.

Taakkua isumaqarput, kommunit isumaginninnermut aqutsisoqarfinnut amerlanerusunik atorfinitsitsinissamut aamma akissarsiaginnerutitsisussanik aningaasaliisuugunik, inuiaqatigiit ajunnginnerusumik inissisimassagaluartut.

Atuaruk: Inunnik sullissisut: Robottiunngilagut

Meeqqat pisinnaatitaaffii pillugit sullissivik MIO 2014-imi maajimi nalunaarummik saqqummiussivoq,’Inatsimmiit suliarineranut’ taasamik, tassani kommunini isumaginninnikkut sulianik aalajangersakkat isornartorsiorneqarput.

'Atugarliorpugut'
Qanittukkut ilisimatusarnikkut Syddansk Universitetimi misissuisoqarneranik isornartorsiuineq sakkortusarneqarpoq, taakkua aamma isumaginninnermut siunnersortit sulinerminni atugaannik suliaqartuupput.

Tassani uppernarsarneqarpoq, iliuusissanik pilersaarutinik amigaateqarnerit malittareqqinneqarnissaminnik amigaateqartunik, tassani meeqqat inuusuttullu suliap ingerlanerani  annertunerusumik ilanngutitinneqartaratik, suliallu malinnaavigalugit ingerlateqqinneqassanatik.

Kalaallit Nunaanni isumaginninnermik siunnersortitut ilinniarsimasunik 240 missaani amerlassusillit kommunini sulinerminni atugassarititaat pitsaanngippallaarput.

Taamaattumillu amerlanngiutsuinnaat tassani sulisarput, kattuffimmi siulittaasut taama oqarput.

Skandinaviamut qiviarniartut
- Inunnik isumaginninnerup tungaa tamarmi politikkikkut sulinermi pingaarnersiuinermi sallinngortissallugu pisariaqarpoq, tassani pineqarlutik kommunimi qitiusumillu ingerlatsiviit: Inunnik isumaginninnermi siunnersortip ataatsip qanoq amerlatigisunik sullitanik akisussaaffeqarnissaa qummut killilerlugu, Sara Abelsen aamma Karen Jensen allapput, qallunaat svenskillu kommuniinik tikkuaapput - ilaatigut Herning - malitassaalluarnerarlugit.

- Tassani misilittagaqarfigineqarpoq, inunnik isumaginninnermi suliaqarnermi imminut akilersinnaasoq aningaasaliissalluni – inuppalaarnikkut aningaasatigullu.

Atuaruk: Meeqqat pillugit siunnersuut MIO-mit tapersersorneqarpoq

Isumaqatiginninnialersut
Isumaginninnermut siunnersortit oqariartuuteqarnerannut meeqqat illersuisuata ingammik Avannaani atukkanik isornartorsiuineranut tunngassuteqaannanngilaq.

NIISIP-ip isumaginninnermut siunnersortinut akissarsianik isumaqatiginninniarnissaa sioqqutilaarlugu tamanna oqariartuutigineqarpoq.

Atuaruk: Sorleq pingaarnerua? Meeraq mittarfilluunniit?