meeqqat inuusuttullu

Naalakkersuisoq IA-p isornartorsiuineranut akissuteqarpoq

Meeqqat inuusuttullu pillugit Naalakkersuisut ersarissumik iliuuseqannginnerarlugit illuatungiuliuttup IA-p isornartorsioqqammerpaat. Naalakkersuisup Martha Lund Olsenip isornartorsiuineq tunngavissaqannginnerarpaa

Ilaqutariinnermut, naligiisitaanermut aamma isumaginninnermut naalakkersuisup Martha Lund Olsenip, Aqqaluaq B. Egedemit isornartorsiuineq paasisinnaanngilaa

Sermitiaq.AG-p marlunngormat allaaserinninneratut, Inuit Ataqatigiit siulittaasuata tullia, Aqqaluaq B. Egede, meeqqat inuusuttullu pillugit ersarissumik iliuuseqannginnerarlugit Naalakkersuisunik isornartorsiuivoq.

- Meeqqat illersugaallutik pitsaanerusumik inuuneqarnissaat qulakkeerumagatsigu, meeqqat ukioqartiinnartarnagit inatsisitigut sukaterinikkut meeqqat illersussavagut, Inatsisartoq ilaatigut taama isornartorsiuivoq.

Naalakkersuisut siulittaasuat Kim Kielsen (S) ukiortaami oqalugiaammini oqaatigaa, ukioq 2016 meeqqat ukiorissagaat.

Atuaruk: Ukiortaami oqalugiaatip kingorna IA iliuutsinik ersarissunik ujartuivoq

Inatsisartunut qinersineq
Ilaqutariinnermut, naligiisitaanermut aamma isumaginninnermut naalakkersuisup Martha Lund Olsenip, Aqqaluaq B. Egedemit isornartorsiuineq paasisinnaanngilaa.

- IA-p siulittaasuata tulliata isornartorsiuinera tupigusuutigaara. Malinnaasimassaguni ilisimassagaluarpaa Naalakkersuisut marloriarlutik meeqqat inuusuttullu pillugit inatsisissatut siunnersuummik saqqummiussiniarlutik suliaqarsimasut, siunnersuutilli Inatsisartunut qinersisoqarneranik pissuteqartumik tunuartinneqartariaqarsimapput, isumaginninnermut naalakkersuisoq tusagassiuutinut nalunaarummini oqarpoq.

Kingullermik Ilaqutariinnermut Ataatsimiititaliap 2014-imi Inatsisartunut qinersisoqarnissaa sioqqullugu isumaliutissiissutip saqqummiunnissaa angumerinngitsooraa taassuma oqaatigaa.

Atuaruk: Kielsen: 2016 meeqqat ukiorissavaat

Una qinigaaffik salliutinniaraa
Martha Lund Olsenip ilanngullugu oqaatigaa, qinigaaffimmi matumani meeqqat inuusuttullu pillugit inatsisissamik nutaamik siunnersuuteqarnissaq salliutinniarlugu.

Siullermilli meeqqat inuusuttullu atugarliortut atugarisaat pillugit piffissami kingullermi oqallinnerujussuup malitsigisaanik kommunit ataatsimeeqatiginiarpai, tassa inatsit nutaaqaqqutigalugu sapinngisamik meeqqat inuusuttullu kommunini pitsaanerusumik sullinneqarnissaasa qulakkeerneqarnissaa siunertaralugu.

Atuaruk: MIO: Meeqqanut atornerlunneqarsimasunut eqqortumik ikiuinissaq amigaataavoq

Powered by Labrador CMS