Sydgrønland
Avaleraasartoorniarnissamut takorluugaq taamaatinneqanngilaq
Qaqortumi aalisartut piniartullu peqatigiifianni ilaasortaat ilaasa siorna aasakkut avaleraasartoorniarnissamut pilersaarutaat iluatsinngitsoorpoq. Pilersaarusioraluartulli amerlanerit umiarsuarmut avaleraasartoorniummut inuttanngorput. Maannakkulli pilersaarutertik aallarteqqissallugu pilersaarusiornialerput
Siorna aasakkut Qaqortumi Aalisartut Piniartullu Peqatigiifanni, QAPP-mi ilaasortat qulit, namminersorlutik avaleraasartoorniarnissaminnut atatillugu pisassanik 8.000 tonsinik qinnuteqaataat Namminersorlutik Oqartussanit itigartinneqarpoq. Taamaalillunilu isumalluarnerugaluaq pakatsinermik taarserneqarpoq.
Maannakkut Qaqortumi umiatsiaararsortut atugaat suli ilungersunartutut nalilerneqarput, ilaatigut sinerissap qanittuani saarulleqannginnera pissutaalluni.
Atuaruk: Avaleraasartoorniarnerup iluatsinngitsup avammut niuerneq eqqorpaa
Qinnuteqaat nutaaq
Tamatumalu kingunerisaanik umiatsiaararsortut arlallit umiarsuarmut avaleraasartoorniummut Malik Seafoodimit pigineqartumut, 4.000 tonsinillu pisassaqartumut, inuttatut ilaanissartik aaliangiuppaat.
Aalisarneq aasaq tamaat novemberi tikillugu ingerlanneqarpoq. Maannakkulli aalisarneq unikkallarmat, umiatsiaararsortut namminersorlutik avaleraasartoorniarnissamut pilersaaruteqartut, pilersaarusioqqittussanngorput, avaleraasartoorniarnermilu sinneqartoorutit avataasiorluni saarullinniutitaarnissamut atorneqartussatut pilersaarutigineqarpoq.
Atuaruk: Tasiilami avaleraasartuut immikkut pissarsissutigineqalersut
Maanna misilittagaqalertut
Siorna aallarnisaasut quliusimagaluartut, maanna arneq pingasuinnaanissartik naatsorsuutigaat. Taamaakkaluartoq piumassusaat mikinerulersimanngitsoq, Søren Noahsen, QAPP-mi siulittaasoq, namminersorlutillu aallartinnissamut pilersaaruteqartut siuttuat, oqarpoq.
– Uppernarsarsinnaavara 2016-imi nutaamik pilersaarusiornissarput piareersarlugu allartittussanngoratta. Siorna iluatsitsinngitsoornerput tunniutiinnassutiginavianngilarput, naak annertuunik unammilligassaqarumaarluta ilisimagaluarlutigu. Maannakkulli misilittagaqarnerulerpugut, tamannalu atorluassavarput, Søren Noahsen oqarpoq.
Allaaserisaq tamaat atuaruk, Kommune Kujallermilu pisut annertuut annikitsullu paasisaqarfigalugit. Aviisi Tamanut Kujataani uani akeqanngitsumik aasinnaavat: