Skip to main content

Tasiilami akiliisinnaajunnaarnerup kingorna Sermersooq allatut iliuuseqartoq

Tasiilami suliffeqarfik sanaartornermik suliaqartoq, Viking Greenland, akiliisinnaajunnaarnerata kingorna kommunip illoqarfimmi illutaa pisiaraa

Viking Greenland Tasiilamiittoq aningaasatigut ajornartorsioreerluni oktoberip naalernerani akiliisinnaajunnaartutut nalunaarutigineqarpoq.

Taamaalillunilu Tasiilami sanaartornermut suliffeqarfituaasoq annaaneqarpoq, illoqarfiullu ulluunerani paaqqinnittarfittaassap inissiallu qulit, eqqakkanut kuuffilersornerat ilanngullugu, sanaartorneqarnerat naammassineqarsimanngitsut qimanneqarlutik.

Atuaruk: Tasiilap sanaartugassanik suliaqartartutuaa akiliisinnaajunnaarpoq

Sermersooq pigisanik pisivoq
Kisianna maanna Kommuneqarfik Sermersooq sanaartugassanik suliffeqarfik pisiaralugu nalunaaruteqarpoq.

Kommuneqarfik Sermersuup naliliinera naapertorlugu, ulluunerani paaqqinnittarfissaq sanaartorlugu naammassineqanngitsoq ima nukingernartigaaq akisussaaffiup kommunimit erngertumik tiguneqarnissaa allaqqunneqarsinnaanani.

- Suliat aallarteqqinniarlugit suliaq piaarnerpaamik aaqqissuutissavarput sulisussallu pisariaqartut sulilersillugit, Sanarfinermut Avatangiisinullu Ingerlatsivimmi pisortaq, Mike Jakob Kristiansen, taama oqaluttuarpoq.  

Inissiat taakku qulit ukiornissaanut piaarnerpaamik isumannaarneqassapput. Aamma sanaartorneqarnerisa naammassineqarnissaannut periarfissanik Kommuneqarfik Sermersooq maannakkorpiaq misissuivoq. Taakkuli sanaartorneqarnerisa kinguaattoorfiunissaat naatsorsuutigineqartariaqarpoq.

Atuaruk: Akiliisinnaajunnaartumit Tasiilami 30-t soraarsitaapput

Taamatut inissisimaneq immikkut ittuuvoq
- Tasiilami taamatut inissisimasoqarnera immikkorluinnaq ittuuvoq. Illoqarfiup entreprenøritut suliffeqarfituaata akiliisinnaajunnaarnera aningaasatigut inunnullu kingunerlutsitsivoq ajoraluartumillu Tasiilami pissutsinik erloqinartunik allanik malitseqarnissaa aarlerinarsilluni. Taamaammat sukkasuumik iliuuseqarpugut, Kommuneqarfik Sermersuumi borgmesteri, Asii Chemnitz Narup (IA) taama oqarpoq.

- Pisut qanimut malittarivagut aammalu inissisimanermit taama erloqinartigisumit attuumassuteqartut sapinngisamik ajunnginnerpaamik qaangiinissaannut iliuusissat pisariaqartut aallartisarlutigit.

Atuaruk: Sermersuumi sanaartornerit akiliisinnaajunnaarnerup eqqorpai

Ataavartussamik aaqqiissutaanngitsoq
Suliffeqarfiup akiliisinnaajunnaarnermi pigisai tamakkerlugit Kommuneqarfik Sermersuumit pisiarineqaraluartut, suliffeqarfiup pineqartup suliassanik isumagisimasaanik ingerlatsinissaminik kommuni pilersaaruteqanngitsoq ilisimititsivoq.

Taamaammat Tasiilami innuttaasut inuussutissarsiutinillu ingerlataqartut siunissami naatsorsuutigissavaat kiffartuussinermik entreprenøritullu suliassat Viking Greenlandip ingerlassimasaasa ilarpassuinik Kommuneqarfik Sermersooq suliarimannittussarsiuussissasoq. 

Tassungalu atatillugu maskinaatit suliassanut tamakkununnga atorneqartut aamma tuniniarneqarnissaat naatsorsuutigineqarpoq. Kommuneqarfik Sermersuup akiliisinnaajunnaarnerup kingunerisaata tamakkerlugit takusaqarsinnaanera ilutigalugu tamanna pissaaq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER